قازاقستاننىڭ وڭتۇستىگىندە اسا قاۋىپتى جۇقپالى دەرت تىركەلدى - باس سانيتارلىق دارىگەر

  قازاقستاننىڭ باس سانيتارلىق دارىگەرى جانداربەك بەكشين ەلدىڭ وڭتۇستىك وڭىرىندە تۇرعىندار كونگو-قىرىم گەمورراگيالىق قىزباسىن جۇقتىرعانىن ايتتى، دەپ حابارلايدى Sputnik قازاقستان تىلشىسى.

"9 جاعداي تىركەلدى. قىزىلوردا وبلىسىندا 4 ادام جانە تۇركىستان وبلىسىندا 4 ادام جۇقتىرعان. تاعى ءبىر ادام بۇل اۋرۋدى وزبەكستان رەسپۋبليكاسىنان جۇقتىرىپتى", - دەدى ول ورتالىق كوممۋنيكاتسيالار قىزمەتىندە وتكەن بريفينگتە.

وسى ورايدا جانداربەك بەكشين شەتەلگە شىعاتىن قازاقستاندىقتارعا ساق بولۋعا كەڭەس بەردى.

"وتە جۇقپالى اۋرۋلاردىڭ بار ەكەنىن ەستەن شىعارماۋىمىز كەرەك. مىسالى، دەنگە بەزگەگى. سوڭعى ەكى جىلدا 9 قازاقستاندىق تۋريست وسى اۋرۋعا شالدىقتى. قازاقستاندىقتار ءۇندىستان، تايلاند، ۆەتنام، سينگاپۋردە بولىپ، ەكزوتيكالىق دەرتتى جۇقتىرعان", - دەدى باس سانيتارلىق دارىگەر.

سونىمەن قاتار بەكشين تىرىسقاق جۇقتىرعان 10 ناۋقاس تىركەلگەنىن اتاپ ءوتتى.

"بۇل جاعداي قىستا تىركەلدى. ۇندىستاندىق تۋريستەر شىمبۇلاققا كەلگەندە بەلگىلى بولدى. وسى اۋرۋ دەر كەزىندە انىقتالىپ، قازاقستاننىڭ باسقا وڭىرلەرىنە تاراۋعا جول بەرىلمەدى", - دەيدى ول.

ءسوز سوڭىندا باس سانيتارلىق دارىگەر شەتەلدە دەمالعىسى كەلەتىن تۋريستەرگە دۇنيەجۇزىلىك دەنساۋلىق ساقتاۋ ۇيىمىنىڭ رەسمي سايتىنا كىرىپ، ءتيىستى اقپارات الۋعا كەڭەس بەردى.