داعىستاندىق ازامات سۋ تاسقىنىنان زارداپ شەككەندەر ءۇشىن ءبىر تاۋلىك بويى جول ءجۇرىپ كەلگەن، دەپ حابارلايدى "ادىرنا" ءتىلشىسى Stan.kz-كە سىلتەپ.
رەسەيدەگى داعىستان رەسپۋبليكاسىنىڭ تۇرعىنى وماراسحاب احمەدوۆ "قيىندىق كەزدە ءبىر-بىرىمىزگە قولداۋ كورسەتۋىمىز" دەپ، اتىراۋعا كومەك قولىن سوزعان.
"تۋىسقاندارىم الەۋمەتتىك جەلىدەن قازاقستاننىڭ رەسەيمەن شەكارالاس ايماقتارىندا تاسقىن سۋدان قورعانىس بوگەتىن بەكىتۋ ءۇشىن قاپ جەتىسپەيدى دەگەن اقپاراتتى وقىپتى. ولار بۇل اقپاراتتى ماعان جەتكىزدى. سودان سوڭ باۋىرلاس ەلگە كومەك بەرۋ ءۇشىن تانىستارىمنان قاپ ىزدەي باستادىم. دوسىمنىڭ زات ساقتايتىن قويماسى بار ەدى. تۇنگى ساعات 02:00 شاماسىندا سول قويمادان جۇك تاسيتىن گازەل كولىگىمە 50 مىڭ قاپتى تيەپ، جولعا شىقتىم. اتىراۋعا تەزىرەك جەتۋ ءۇشىن تۇنىمەن جولدا ءجۇردىم", – دەيدى داعىستاندىق ازامات.
داعىستاندىق ازامات قولدان كەلگەنشە كومەك بەرۋدى كوزدەگەن.
"تۇراتىن ەلىمىز بولەك بولعانىمەن، قيىندىق كەزدە ءبىر-بىرىمىزگە قولداۋ كورسەتۋىمىز كەرەك. ماقساتىم – تۋىسقان حالىقتىڭ وسىنداي قيىندىقتان امان قالۋىنا ۇلەسىمدى قوسۋ", – دەيدى ول.
