Batys Qazaqstan oblysynyń ákimi óńirdegi jaǵdaıdy baıandady, dep habarlaıdy "Adyrna" tilshisi Tengrinews.kz-ke siltep.
Aımaq basshysy oblysta sý tasqyny jaǵdaıynyń shıeleniskenin aıtyp, Jaıyq ózenindegi sý deńgeıi 7 metrge jetip, shekti deńgeıge jaqyndaǵanyn aıtty.
Oblystaǵy Aqjaıyq, Bórli, Báıterek, Terekti aýdandarynda, Oral qalasynyń Jaıyq ózeniniń boıynda ornalasqan aýdandarynda 94 eldi mekendi sý basý qaýpi tónip tur. Oblys ákimi:
«Barlyq resýrstardy jumyldyrdyq, Jaıyq ózeniniń jaǵalaýyndaǵy asa qaýipti ýchaskelerde bógetter salynýda.Jaǵalaýdy nyǵaıtý jumystaryna 200 birlik tehnıka jumyldyrylyp, 1000-ǵa jýyq adam jumyldyrylǵan», - dedi Narıman Tóreǵalıev.
Narıman Tóreǵalıev Memleket basshysy sý tasqyny jaǵdaıyna baılanysty Qazaqstan halqyna Joldaýynda tabıǵı apattan zardap shekken birde-bir turǵynnyń kómeksiz qalmaıtynyn atap ótkenin eske saldy.
«Zardap shekkenderge oblys jurtshylyǵy da úlken qoldaý kórsetýde. Oblystyń kásipkerleri, qoǵamdyq birlestikter, volonterlar jáne qarapaıym oblys turǵyndary kómektesýde, bul úshin olarǵa úlken alǵys aıtamyz. Endi taǵy bir ret eske salǵym keledi. Osy qıyn kezeńde sabyrlylyq tanytyp, bir-birimizge qoldaý kórsetýimiz qajet. Sonymen qatar qazirgi sý tasqyny jaǵdaıy týraly resmı aqparat kózderine ǵana senýlerińizdi suraımyn», - dedi oblys ákimi.
