گەرمانيا استاناسى بەرليندە قازاقستانداعى تۇرمىستىق زورلىق-زومبىلىققا قارسى اكتسيا ءوتتى. بۇل تۋرالى Euronews جاريالادى، دەپ حابارلايدى “ادىرنا” ۇلتتىق پورتالى.
شەرۋ ايەلىن ءولتىردى دەپ ايىپتالعان ەكس-مينيستر قۋاندىق بيشىمباەۆتىڭ سوتى ءوتىپ جاتقاندا بولدى. بيشىمباەۆ سوتتا "نۇكەنوۆانىڭ ولىمىنە قاتىسى بارىن" ايتادى، بىراق "اسا قاتىگەزدىكپەن ولتىرمەدىم" دەيدى.
Euronews تەلەارناسىنىڭ حابارلاۋىنشا، شاراعا قازاق، اعىلشىن جانە ورىس تىلىندە پلاكات الىپ كەلگەن ونداعان ادام كەلگەنىن، ولار "قول كوتەرسە سوتتالۋى كەرەك", "بيشىمباەۆقا ءومىر بويىنا تۇرمە جازاسى كەسىلسىن" دەپ ۇرانداتقان.
اكتسيا قاتىسۋشىلار Euronews تەلەارناسىنا بەرگەن سۇحباتىندا قازاقستاندا تۇرمىستىق زورلىق-زومبىلىق ءالى قىلمىس دەپ تانىلماعانىن ايتىپ، ەكس-مينيستر تۇرمە جازاسىنان قۇتىلىپ يا جەڭىل جازا الماۋى ءتيىس دەگەن. شاراعا كەلگەندەر قازاقستاندا زورلىق-زومبىلىقتى جويۋ ءۇشىن تۇرمىستىق زومبىلىققا قارسى زاڭ قابىلداۋ كەرەك دەپ ايتقان.
ۇيىمداستىرۋشىلاردىڭ ەسەبىنشە بەرليندەگى اكتسياعا 120-دان اسا ادام قاتىسقان. ولاردىڭ اراسىندا قازاقستاننان بولەك ازەربايجان، ءۇندىستان، قىرعىزستان، تۇركىمەنستان، وزبەكستان، ۋكراينا جانە وڭتۇستىك كورەيادان دا ادامدار بولعان.
ەسكە سالساق، قۋاندىق بيشىمباەۆ سالتانات نۇكەنوۆانى 2023 جىلدىڭ قاراشاسىندا مەيرامحانانىڭ VIP كابيناسىندا سەگىز ساعات بويى ۇرىپ-سوعىپ، كەيىن ايعاقتاردى جويماق بولعان. وقيعاعا جينالعانداردىڭ ەشقايسىسى ارالاسپادى. كەلەسى كۇنى تاڭەرتەڭ سالتانات مەيرامحانادان ءولى تابىلدى.
قازىر بۇل ءىس بويىنشا سوت پروتسەسى ءجۇرىپ جاتىر، بىراق بيشىمباەۆ ءوز كىناسىن مويىنداماي، سوتتا ءوزىن دورەكى ۇستاۋدا. سالتاناتتىڭ قۇربىسى لينارا سماعۇلوۆا بۇعان دەيىن بيمىشباەۆتىڭ ايەلىن ۇنەمى قورلاپ، ۇرىپ-سوعىپ جۇرگەنىن باق وكىلدەرىنە ايتقان بولاتىن. وسى جولعى جيىندا نارازىلىق بىلدىرۋشىلەر قازاقستاندا تۇرمىستىق زورلىق-زومبىلىق ءۇشىن جازانى قاتايتىپ، ەكس-ءمينيستردى ءومىر بويىنا باس بوستاندىعىنان ايىرۋدى تالاپ ەتتى.
