2022 جىلى 17 قازاندا ەكس-مينيستر قۋاندىق بيشىمباەۆ پەن سالتانات نۇكەنوۆانىڭ نەكەسىن قيعان رەسپۋبليكالىق باس مەشىتتىڭ يمامى قانات قىدىرمينگە قاتىستى تارتىپتىك شارا قولدانىلدى. بۇل تۋرالى ءمۇفتياتتىڭ ءباسپاسوز حاتشىسى اعابەك قوناربايۇلى ايتتى، دەپ حابارلايدى «ادىرنا» ءتىلشىسى.
«2022 جىلدىڭ 17 قازانىندا استانا قالاسىنداعى رەسپۋبليكالىق باس مەشىتتە ق.بيشىمباەۆ پەن س.نۇكەنوۆانىڭ ءوز وتىنىشتەرى بويىنشا كۋاگەرلەردىڭ قاتىسۋىمەن ولاردىڭ نەكەلەرى قيىلعان. اتالعان ازاماتتاردان جانە ولاردىڭ تۋىستارىنان احات بولىمىنە تىركەلگەنىن راستايتىن كۋالىك تالاپ ەتىلگەندە، «جاسالىپ جاتىر» دەپ جاۋاپ بەرگەن. ولار داستۇرگە ساي ەكى جاقتىڭ اتا-انالارىنىڭ باتاسى مەن رۇقساتىن العانىن، سالت-ءداستۇر جولىمەن نەكەلەرىن قيىپ بەرۋىن وتىنگەن. اتالعان ازاماتتاردان احات بولىمىنە تىركەلگەنىن راستايتىن كۋالىكتى تاباندى تۇردە تالاپ ەتپەگەن، ياعني قمدب-نىڭ ىشكى جۇمىس ءتارتىبىن بۇزعان رەسپۋبليكالىق باس مەشىتتىڭ يمامى قانات قىدىرمينگە تارتىپتىك شارا قولدانىلىپ، ەسكەرتۋ جاسالدى»، - دەپ جازدى ول.
سونداي-اق قمدب ازاماتتىق نەكەنىڭ زيناعا جاتاتىنىن ەسكەرتتى.
«قازاقستان مۇسىلماندارى ءدىني باسقارماسى احات بولىمىندە رەسمي تىركەلمەي نەمەسە مۇسىلمانشا نەكە قيىلماعان «ازاماتتىق نەكە» زينا بولىپ سانالاتىنىن مالىمدەيدى. جوعارىدا اتالعان تەرىس سيپاتتاعى «ازاماتتىق نەكەنىڭ» شاريعاتتاعى ۇكىمى – حارام. مۇسىلمان بالاسى ارتى وپىق جەگىزەتىن مۇنداي اۋىر ءارى لاس كۇنادان اۋلاق بولۋى ءتيىس»،—دەلىنگەن حابارلامادا.
