سۋ رەسۋرستارى جانە يرريگاتسيا مينيسترلىگى ەلدىمەكەندەردى سۋ تاسقىنىنان قورعاۋ جانە تاسقىن سۋىن جيناۋ ماقساتىندا 20 سۋ قويماسىن سالادى. بۇل تۋرالى 11 ساۋىردە وكق-دا وتكەن بريفينگ بارىسىندا مينيسترلىكتىڭ رەسمي وكىلى ءمولدىر ابدۋاليەۆا ايتتى، دەپ حابارلايدى «ادىرنا» ءتىلشىسى.
جاڭا سۋ قويمالارى 11 وبلىستا بوي كوتەرمەك.
«بەس سۋ قويماسىنىڭ قۇرىلىسىن بيىل باستاۋ جوسپارلانىپ وتىر. جاڭا سۋ قويمالارى سۋارمالى جەرلەردىڭ اۋدانىن 250 مىڭ گەكتارعا ۇلعايتۋعا جانە 137 مىڭ تۇرعىنى بار 70 ەلدى مەكەندى سۋ باسۋ قاۋپىن ازايتۋعا سەپتىگىن تيگىزەدى. سونداي-اق، ەلىمىزدەگى جۇمىس ىستەپ تۇرعان 15 سۋ قويماسىنا رەكونسترۋكتسيا جاسالادى. بۇل 70 مىڭ ادام تۇراتىن 64 ەلدى مەكەندى سۋ باسۋ قاۋپىن ازايتۋعا، سونداي-اق 74 مىڭ گا سۋارمالى جەرگە سۋ بەرۋدى جاقسارتۋعا مۇمكىندىك بەرەدى»، - دەدى ءمولدىر ابدۋاليەۆا.
ايتا كەتەيىك، قازىرگى ۋاقىتتا سقو-دا سۋ تاسقىنى جالعاسىپ جاتىر. ال بقو-دا يرەكلى سۋ قويماسىنان جىبەرىلگەن سۋ قازاقستان شەكاراسىنا ازىرگە جەتكەن جوق. بۇل سۋ 15-20 ساۋىردە كەلەدى دەپ كۇتىلىپ وتىر.
شىعىس قازاقستان وبلىسىندا ءۇش ءىرى سۋ قويماسىنىڭ ورتاشا سۋ جيناۋ كولەمى 84,8%. وڭىردە سۋ تاسقىنى باستالدى، سوندىقتان ەرتىس سۋ قويمالارىنىڭ كاسكادى بويىنشا سۋ جىبەرىلىپ جاتىر.
قازگيدرومەتتىڭ مالىمەتىنشە، جاباي وزەنىنىڭ رەتتەلمەيتىن اعىنى ارتىپ كەلەدى. سوندىقتان اقمولا وبلىسىنىڭ اتباسار اۋدانىندا سۋ تاسقىنى قاۋپى بار.
«مينيسترلىك، ءوڭىر اكىمدىگى جانە تجد قاۋىپتىڭ الدىن الۋ ءۇشىن بەلسەندى جۇمىس ىستەپ جاتىر»، - دەدى سۋ رەسۋرستارى جانە يرريگاتسيا مينيسترلىگىنىڭ رەسمي وكىلى.
اقتوبە وبلىسىندا ەكى ءىرى سۋ قويماسى 97%-عا تولدى. وڭىردەگى جاعداي تۇراقتى.
مينيسترلىك ماماندارى تاسقىن سۋىن اپاتسىز وتكىزۋ جانە ونى جيناۋ جۇمىستارىن قاداعالاۋدا.
