قازاقستان بيلىگى ۇلىتاۋ وبلىسىنداعى كەڭگىر سۋ قويماسىنىڭ گيدروتەحنيكالىق قۇرىلىستارىن مەملەكەت مەنشىگىنە قايتاردى. بۇل تۋرالى پروكۋراتۋرانىڭ ءباسپاسوز قىزمەتى مالىمەدەدى، دەپ حابارلادى “ادىرنا”.
اكتيۆتى قايتارۋ ءۇشىن قاداعالاۋ ورگانى سۋ رەسۋرستارى ءمينيسترىنىڭ اتىنا ۇسىنىس جاسادى.
سۋ قويماسىنىڭ يەسى — «قازاقمىس ديستريبيۋشن» جشس-مەن سىيعا تارتۋ كەلىسىمشارتى جاسالدى.
«ەندى ۋاكىلەتتى ورگاندار سۋ قويماسى مەن ونىڭ گيدروتەحنيكالىق قۇرىلىمدارىن كەشەندى تەكسەرۋدى جۇرگىزىپ، ودان ءارى مودەرنيزاتسيا جاساۋ شارالارىن قابىلداۋى قاجەت»، — دەپ اتاپ ءوتتى پروكۋراتۋرا.
1952 جىلى سالىنعان كەڭگىر سۋ قويماسى - ۇلىتاۋ وبلىسىنداعى ەڭ ۇلكەنى. ونىڭ سىيىمدىلىعى 319 ملن تەكشە مەتردى قۇرايدى. بۇل ستراتەگيالىق وبەكتى «قازاقمىس ديستريبيۋشن» جشس-ءنىڭ بالانسىندا بولدى. سۋ قويماسىن مەملەكەتكە قايتارۋ قاجەتتىلىگى بىرنەشە جىل بويى كوتەرىلگەن بولاتىن. مىسالى، دەپۋتات رىسقالي ابدىكەرۇلى 1996 جىلعى ۇكىمەت قاۋلىسىمەن سىلتەمە جاساپ، ونىڭ ورىندالۋى ءتۇرلى سەبەپتەرمەن سوزىلىپ كەلگەنىن اتاپ ءوتتى.
«قازاقمىس ديستريبيۋشن» جشس «قازاقمىس» توبىنىڭ قۇرامىنا كىرەدى. egov.kz مالىمەتتەرى بويىنشا، توپتىڭ يەسى - Kazakhmys Copper. ونىڭ 100% اكتسياسى نيدەرلاندتىق KCC B.V. حولدينگىنىڭ قولىندا. KASE-دە جاريالانعان ەسەپتەرگە سايكەس، KCC B.V. حولدينگىنىڭ سوڭعى باقىلاۋشىسى ۆلاديمير كيم (70%), ال 30% ۇلەسى كورپوراتسيانىڭ بۇرىنعى باسشىسى ەدۋارد وگايۋعا تيەسىلى. ەكى كاسىپكەر دە Forbes.kz رەيتينگىندە قازاقستاننىڭ ەڭ باي 20 ادامىنىڭ قاتارىندا.
