«ادىرنا» ۇلتتىق پورتالىنىڭ كەزەكتى سۇحباتى جامبىل وبلىسى توتەنشە جاعدايلار دەپارتامەنتى باستىعىنىڭ ورىنباسارى، پولكوۆنيك رۋسلان ورىنبەكوۆ بولدى.
– رۋسلان مىرزا، وبلىستاعى توتەنشە جاعدايعا كەرەكتى تەحنيكالار سانى قانشا؟
— دەپارتامەنتتىڭ ءورت ءسوندىرۋ-قۇتقارۋ بولىمشەلەرىنىڭ قىزمەتىندە نەگىزگى، ارنايى جانە قوسالقى ماقساتتاعى 141 بىرلىك تەحنيكا بار، ونىڭ ىشىندە:
- نەگىزگى ءورت ءسوندىرۋ اۆتوكولىكتەرى – 67 بىرلىك;
- ارنايى ءورت ءسوندىرۋ اۆتوكولىكتەرى – 18 بىرلىك;
- قوسالقى ءورت ءسوندىرۋ اۆتوكولىكتەرى – 56 بىرلىك.
— وبلىستاعى جاعدايعا وراي تەحنيكا تاپشىلىعى سەزىلە مە؟ بولسا، قانداي ساناتتاعى تەحنيكا جەتىسپەيدى؟
— تەحنيكالاردىڭ ساناتى بويىنشا جابدىقتالۋى:
- نەگىزگى ءورت ءسوندىرۋ اۆتوكولىكتەرى – 67 بىرلىك (جاراقتالۋى 93 % قۇرايدى، تيىستىلىك نورماسىنا سايكەس 72 بىرلىك بولۋى قاجەت);
- ارنايى ءورت ءسوندىرۋ اۆتوكولىكتەرى – 18 بىرلىك (جاراقتالۋى 81 % قۇرايدى، تيىستىلىك نورماسىنا سايكەس 22 بىرلىك بولۋى قاجەت);
- قوسالقى ءورت ءسوندىرۋ اۆتوكولىكتەرى – 56 بىرلىك (جاراقتالۋى 54 % قۇرايدى، تيىستىلىك نورماسىنا سايكەس 103 بىرلىك بولۋى قاجەت).
بالانستاعى تەحنيكالاردىڭ ىشىندەگى 16 بىرلىگى پايدالانۋ مەرزىمى 20 جىلدان اسقان، ول جالپى اۆتوكولىك پاركىنىڭ 12 % قۇرايدى جانە ەسكىرگەن تەحنيكالاردان تۇرادى. ەسەپتەن شىعارۋدى ەسەپكە الماعاندا ءورت ءسوندىرۋ تەحنيكاسىنا قاجەتتىلىك 25 بىرلىكتى قۇرايدى.
— اعىمداعى جىلى وسى دەپارتامەنتتىڭ تەحنيكالىق بازاسى ءۇشىن
بيۋدجەتتەن قانشا قارجى ءبولىندى؟
— دەپارتامەنتتىڭ ءورت ءسوندىرۋ-قۇتقارۋ بولىمشەلەرىن تەحنيكامەن جابدىقتاۋ رەسپۋبليكالىق جانە جەرگىلىكتى بيۋدجەت ەسەبىنەن قارجىلاندىرۋ ارقىلى جۇرگىزىلەدى. رەسپۋبليكالىق بيۋدجەتتەن قارجىلاندىرۋ قازاقستان رەسپۋبليكاسى توتەنشە جاعدايلار مينيسترلىگىنىڭ ورتكە قارسى قىزمەت كوميتەتىمەن ساتىپ الۋ ارقىلى جانە وبلىستارعا ءبولۋ تارتىبىمەن كەزەڭ-كەزەڭىمەن بولىنەدى. جەرگىلىكتى بيۋدجەتتەن ارناي تەحنيكالاردى ساتىپ الۋ ءۇشىن اعىمداعى جىلى 274 ميلليون 600 مىڭ تەڭگە قاراجات ءبولىنىپ، مەملەكەتتىك ساتىپ الۋ پورتالىنا ساتىپ الۋ جونىندە كونكۋرسىنا حابارلامالار ورنالاستىرىلدى. 2025 جىلى ارنايى تەحنيكالاردى ساتىپ الۋ ءۇشىن، جەرگىلىكتى بيۋدجەت ەسەبىنەن 1 ملرد. 662 ملن. 730 مىڭ تەڭگە قارجاتتى ءبولۋ جوسپارلانۋدا. دەپارتامەنتتىڭ قۇرلىمدىق بولىمشەلەرىنە 2020-2023 جىلدار ارالىعىندا رەسپۋبليكالىق بيۋدجەتتەن 28 بىرلىك جانە جەرگىلىكتى بيۋدجەت ەسەبىنەن 21 بىرلىك، بارلىعى 49 بىرلىك تەحنيكالار ساتىپ الىندى.
— توتەنشە جاعداي دەپارتامەنتىن جابدىقتاۋعا بايلانىستى باسقا قانداي جەرگىلىكتى ەرەكشەلىكتەر بار؟ تەحنيكامەن جابدىقتاۋدا بۇل ەرەكشەلىكتەر ەسكەرىلە مە؟
— جامبىل وبلىسى توتەنشە جاعدايلار دەپارتامەنتىن تەحنيكالىق جاراقتاندىرۋ كەزىندە وبلىستىڭ گەوگرافيالىق، كليماتتىق جاعدايى جانە وزگە دە ەرەكشەلىكتەرى ەسكەرىلەدى. مىسالى، سالىنىپ جاتقان كوپقاباتتى عيماراتتاردىڭ (10 قاباتتان جوعارى) كوبەيۋى مەن سالىنىپ جاتقانىن ەسكەرە وتىرىپ، وبلىس ورتالىعىندا تاراز قالاسى ءۇشىن، «ال-55» ءورت ءسوندىرۋ اۆتوساتىسىن نەمەسە «اكپ-50» ءاۆتويىندى كوتەرگىشتى ساتىپ الۋدىڭ شۇعىل قاجەتتىلىگى بار. بۇگىنگى تاڭدا تاراز قالاسىنىڭ اۋماعىندا 7 بيىك عيمارات بار (12 قاباتتى تۇرعىن ءۇي – 2, 10 قاباتتى تۇرعىن ءۇي – 5).
وسىعان وراي، قازىرگى تاڭدا جامبىل وبلىسىنىڭ ورتكە قارسى قىزمەتى گارنيزونىنىڭ جاراعىنا «ال-55» ءورت ءسوندىرۋ اۆتوساتىسىن نەمەسە رەسپۋبليكالىق بيۋدجەت قاراجاتى ەسەبىنەن «اكپ-50» ءاۆتويىندى كوتەرگىشىن ساتىپ الۋ ماسەلەسى قاراستىرىلۋدا.
- جاۋابىڭىزعا راقمەت!
