«Adyrna» ulttyq portalynyń kezekti suhbaty Jambyl oblysy Tótenshe jaǵdaılar departamenti bastyǵynyń orynbasary, polkovnık Rýslan Orynbekov boldy.
– Rýslan myrza, oblystaǵy tótenshe jaǵdaıǵa kerekti tehnıkalar sany qansha?
— Departamenttiń órt sóndirý-qutqarý bólimsheleriniń qyzmetinde negizgi, arnaıy jáne qosalqy maqsattaǵy 141 birlik tehnıka bar, onyń ishinde:
- negizgi órt sóndirý avtokólikteri – 67 birlik;
- arnaıy órt sóndirý avtokólikteri – 18 birlik;
- qosalqy órt sóndirý avtokólikteri – 56 birlik.
— Oblystaǵy jaǵdaıǵa oraı tehnıka tapshylyǵy sezile me? Bolsa, qandaı sanattaǵy tehnıka jetispeıdi?
— Tehnıkalardyń sanaty boıynsha jabdyqtalýy:
- negizgi órt sóndirý avtokólikteri – 67 birlik (jaraqtalýy 93 % quraıdy, tıistilik normasyna sáıkes 72 birlik bolýy qajet);
- arnaıy órt sóndirý avtokólikteri – 18 birlik (jaraqtalýy 81 % quraıdy, tıistilik normasyna sáıkes 22 birlik bolýy qajet);
- qosalqy órt sóndirý avtokólikteri – 56 birlik (jaraqtalýy 54 % quraıdy, tıistilik normasyna sáıkes 103 birlik bolýy qajet).
Balanstaǵy tehnıkalardyń ishindegi 16 birligi paıdalaný merzimi 20 jyldan asqan, ol jalpy avtokólik parkiniń 12 % quraıdy jáne eskirgen tehnıkalardan turady. Esepten shyǵarýdy esepke almaǵanda órt sóndirý tehnıkasyna qajettilik 25 birlikti quraıdy.
— Aǵymdaǵy jyly osy departamenttiń tehnıkalyq bazasy úshin
bıýdjetten qansha qarjy bólindi?
— Departamenttiń órt sóndirý-qutqarý bólimshelerin tehnıkamen jabdyqtaý respýblıkalyq jáne jergilikti bıýdjet esebinen qarjylandyrý arqyly júrgiziledi. Respýblıkalyq bıýdjetten qarjylandyrý Qazaqstan Respýblıkasy Tótenshe jaǵdaılar mınıstrliginiń Órtke qarsy qyzmet komıtetimen satyp alý arqyly jáne oblystarǵa bólý tártibimen kezeń-kezeńimen bólinedi. Jergilikti bıýdjetten arnaı tehnıkalardy satyp alý úshin aǵymdaǵy jyly 274 mıllıon 600 myń teńge qarajat bólinip, memlekettik satyp alý portalyna satyp alý jóninde konkýrsyna habarlamalar ornalastyryldy. 2025 jyly arnaıy tehnıkalardy satyp alý úshin, jergilikti bıýdjet esebinen 1 mlrd. 662 mln. 730 myń teńge qarjatty bólý josparlanýda. Departamenttiń qurlymdyq bólimshelerine 2020-2023 jyldar aralyǵynda Respýblıkalyq bıýdjetten 28 birlik jáne jergilikti bıýdjet esebinen 21 birlik, barlyǵy 49 birlik tehnıkalar satyp alyndy.
— Tótenshe jaǵdaı departamentin jabdyqtaýǵa baılanysty basqa qandaı jergilikti erekshelikter bar? Tehnıkamen jabdyqtaýda bul erekshelikter eskerile me?
— Jambyl oblysy Tótenshe jaǵdaılar departamentin tehnıkalyq jaraqtandyrý kezinde oblystyń geografııalyq, klımattyq jaǵdaıy jáne ózge de erekshelikteri eskeriledi. Mysaly, salynyp jatqan kópqabatty ǵımarattardyń (10 qabattan joǵary) kóbeıýi men salynyp jatqanyn eskere otyryp, oblys ortalyǵynda Taraz qalasy úshin, «AL-55» órt sóndirý avtosatysyn nemese «AKP-50» avtoıindi kótergishti satyp alýdyń shuǵyl qajettiligi bar. Búgingi tańda Taraz qalasynyń aýmaǵynda 7 bıik ǵımarat bar (12 qabatty turǵyn úı – 2, 10 qabatty turǵyn úı – 5).
Osyǵan oraı, qazirgi tańda Jambyl oblysynyń órtke qarsy qyzmeti garnızonynyń jaraǵyna «AL-55» órt sóndirý avtosatysyn nemese respýblıkalyq bıýdjet qarajaty esebinen «AKP-50» avtoıindi kótergishin satyp alý máselesi qarastyrylýda.
- Jaýabyńyzǵa raqmet!
