تەلەۆيزيا ارداگەرى سەرىك بايحونوۆ ومىردەن ءوتتى، دەپ حابارلايدى "ادىرنا" ءتىلشىسى.
ول 1953 جىلى 12 مامىردا قىزىلوردا وبلىسىندا ومىرگە كەلگەن. وقۋىن تامامداعان سوڭ رەسپۋبليكالىق گازەتتەر رەداكتسيالارىندا،«قازاقفيلم» كينوستۋدياسىندا جۇمىس ىستەدى. 1990—1998 جىلدارى قازاق رەسپۋبليكالىق تەلەديدارىنىڭ باس رەداكتورى قىزمەتىن، «قازمىرىش» اشىق اكتسيونەرلىك قوعامىندا ەڭبەك ەتتى.
تۇلعا 71 جاسىنا قاراعان شاقتا ومىردەن ءوتتى. قارالى حاباردى اقىن بايبوتا قوشىم-نوعاي Facebook جەلىسى ارقىلى جەتكىزدى.
"قارالى حاباردى جەتكىزۋ مۇنشاما قيىن بولار ما؟!. اياق استىنان قاتەرلى دەرتكە بوي الدىرىپ، تاياۋدا عانا تۇركيادا وتا جاساتىپ كەلگەن سوڭ، استانادا ەم الىپ جاتىر ەدى... ءبىر ساعات بۇرىن دوسىمىز، جازۋشى، ساياحاتشى، قازاقستان جازۋشىلار وداعىنىڭ احمەت بايتۇرسىنوۆ اتىنداعى سىيلىعىنىڭ لاۋرەاتى سەرىك بايحونوۆقا ۋاقىت بولىپتى دەپ ەستىدىم.1973 جىلى جيىرما جاسىندا تۇڭعىش حيكاياتى «جالعاسىم مەنىڭ – جالعاسىم مەنىڭ» «جالىن» جۋرنالىندا جاريالانىپ، جازۋشى رەتىندە قاتارىنان ەرتە تانىلعان سەرىك بايحونوۆتىڭ «ەڭ ىستىق ماۋسىم»، «قوس شاتىرلى ءۇي»، «سال ۇستىندەگى ماۋسىم»، «قۇيىلىستا»، «عاجاپستانعا ساياحات»، «التاي اسۋ» ت.ب. كوپتەگەن اڭگىمەلەر، حيكاياتتار، رومان جانە ساياحات كىتاپتارى جارىق كورگەن. ول قازاق تەلەۆيدەنيەسى ارقىلى تانىلعان «جىگىتتىڭ سۇلتانى»، «تايبۋرىل»، «سيقىرلى قازان»، «قازاقتىڭ قاجىمۇقانى» رەسپۋبليكالىق كونكۋرستىق باعدارلامالارىنىڭ اۆتورى بولدى. سەكەڭ كاسىبي ساياحاتشى رەتىندە «سال ۇستىندەگى ماۋسىم»، «ارالعا – اراشا»، «ارنالارعا ءتىل بىتسە»، «وسىمدىكتەر جەلىسىنە ساياحات»،«بەتپاقدالا – ءشول ەمەس» ەكسپەديتسيالارىن باسقاردى.قارالى حاباردى قۇلاعىم ەستىسە دە، كوڭىلىم سەنبەي، قوش، باقۇل بول دەۋگە ەرىنىمنىڭ يكەمى كەلمەي وتىر. ءومىرى ومىرىمىزبەن بىتە قايناسقان قالامگەر دوسىمىزدىڭ فانيدەگى ساپارى اياقتالىپ، ماڭگىلىك عۇمىرى باستالدى...", - دەپ جازدى.
جازۋشىنىڭ تۇڭعىش پوۆەسى «جالعاسىم مەنىڭ – جالعاسىم». ول 1973 جىلى «جالىن» جۋرنالىندا جارىق كورگەن. شىعارمالارى انا تىلدە جازىلىپ، ورىس تىلىنە اۋدارىلعان. «جىگىتتىڭ سۇلتانى»، «تايبۋرىل»، «سيقىرلى قازان»، «قازاقتىڭ قاجىمۇقانى» رەسپۋبليكالىق كونكۋرستىق باعدارلامالارىنىڭ اۆتورى.
كاسىبي ساياحاتشى رەتىندە تانىلعان سەرىك بايحونوۆ «سال ۇستىندەگى ماۋسىم»، «ارالعا – اراشا»، «ارنالارعا ءتىل بىتسە»، «وسىمدىكتەر جەلىسىنە ساياحات»، «بەتپاقدالا – ءشول ەمەس» ەكسپەديتسيالارىن باسقارعان.
قازاقستان جازۋشىلار وداعىنىڭ احمەت بايتۇرسىنوۆ اتىنداعى سىيلىعىنىڭ لاۋرەاتى اتانعان.
