اقىن، ساتيريك، ادەبيەتتانۋشى مىڭباي ءراش ومىردەن ءوتتى، دەپ حابارلايدى "ادىرنا" ءتىلشىسى.
بۇل تۋرالى جازۋشىلار وداعى رەسمي تەلەگرام ارناسىندا جاريالادى.
«قالامگەر اعامىزدىڭ جيىرمادان استام ولەڭدەر جيناعى مەن ساتيرالارى كىتاپ بولىپ شىققان. مىڭباي ءراش كوبىنەسە ساتيرا جانرىندا ەڭبەك ەتىپ، سىقاقتارى مەن فەلەتوندارى، مىسالدارى كورشىلەس، تۋىسقان حالىقتار تىلدەرىنە اۋدارىلعان. زامانىندا سىقاق جانرىنداعى ەڭبەگىن زاڭعار جازۋشى عابيت مۇسىرەپوۆ ەرەكشە باعالاعانىن جاقسى بىلەمىز. كەشەدەن بەرى قازاقستان جازۋشىلار وداعىنىڭ باسقارماسى ابىز اقساقالدى سوڭعى ساپارعا شىعارىپ سالۋ ماسەلەسىمەن اينالىسىپ جاتىر. جانازاسى، اسى قايدا، قاشان وتەتىنىن قوسىمشا حابارلايمىز»، - دەپ جازىلعان حابارلامادا.
مىڭباي ءراشتىڭ ومىردەن وتكەنىن جازۋشىلار وداعىنىڭ مۇشەسى عابيدەن جاكەي دە جازىپ، الەۋمەتتىك جەلىدە ەستەلىگىمەن ءبولىستى.
"مىڭباي ءراش كوبىنەسە ساتيرا جانرىندا ەڭبەك ەتىپ، سىقاقتارى مەن فەلەتوندارى، مىسالدارى كورشىلەس، تۋىسقان حالىقتار تىلدەرىنە اۋدارىلعان. زامانىندا سىقاق جانرىنداعى ەڭبەگىن زاڭعار جازۋشى عابيت مۇسىرەپوۆ ەرەكشە باعالاعان ەكەن.....93 جاسىندا دۇنيە سالىپ وتىر ، يمانىڭىز سالامات بولسىن، جازۋشىلار وداعىندا 5-6 جىل قىزمەتتەس بولدىق ،وتە ەرەكشە ادام ەدى", - دەپ جازدى عابيدەن جاكەي.
ادەبيەتتانۋشى 1930 جىلى 19 قازاندا سەمەي وبلىسى، شۇبارتاۋ اۋدانىنىڭ 10-اۋىلىندا دۇنيەگە كەلگەن.
اباي اتىنداعى قازاق پەداگوگيكالىق ينستيتۋتىنىڭ ءتىل جانە ادەبيەت فاكۋلتەتىن بىتىرگەن سوڭ «لەنينشىل جاس» (قازىرگى «جاس الاش») گازەتىندە، «ارا — شمەل» جۋرنالدارىندا ءبولىم مەڭگەرۋشىسى بولىپ ەڭبەك ەتكەن. كەيىننەن قازاق كسر كينەماتوگرافيا جونىندەگى مەملەكەتتىك كوميتەتىندە، «عىلىم» باسپاسى مەن «قازاقستان» باسپاسىنىڭ باس رەداكتورى، قازاقستان جازۋشىلار وداعىندا ادەبي كەڭەسشى بولىپ جۇمىس ىستەدى.
مىڭباي ءراشتىڭ تۇڭعىش ولەڭدەر جيناعى 1955 جىلى «العاشقى بوروزدا» دەگەن اتپەن جارىققا شىقتى.
