"بۇگىن مىنە، بارشا حالىق بولىپ، ۇلتتىق اسپاپتان شىققان كۇيدىڭ قۇدىرەتىن، قۋاتىن سەزىندىك. "سارىارقا", "بالبىراۋىن", "اداي", "القيسسا" كۇيلەرى ۇلتتىق رۋحىمىزدى كوتەرەتىن تاڭعاجايىپ تۋىندىلار. دومبىرانىڭ پەرنەسىنەن شىققان كۇيدە حالقىمىزدىڭ تەرەڭ تاريحى بار. ءبىز اتادان بالاعا امانات بولعان اسىل مۇرامىزدى ساقتاپ، قادىر تۇتۋىمىز قاجەت. قۇرمانعازى، داۋلەتكەرەي، تاتتىمبەت، دينا، نۇرعيسالار باستاعان كۇيشىلىك ءداستۇردى ەلىمىزدىڭ دارىندى جاستارى جالعاستىرىپ كەلەدى", - دەدى قاسىم-جومارت توقاەۆ.
سونىمەن قاتار، مەملەكەت باسشىسى مەكتەپتەردە دومبىرا ساعاتىن وتكىزۋدى ۇسىندى.
"بۇل رۋحاني جاڭعىرۋ جولىنىڭ نەگىزگى ارقاۋى. بۇگىندە ۇلتتىق اسپابىمىز كۇللى الەم مويىنداعان مادەني قۇندىلىققا اينالدى. بۇل قازاقتىڭ قاسيەتتى قارا دومبىراسىنا بەرىلگەن ءادىل باعا. "ونەر - ۇلت كەلبەتى" دەيدى دانا حالقىمىز. بارشامىزعا ورتاق قۇندىلىق - دومبىرانى جان-جاقتى ناسيحاتتاپ، جاس ۇرپاقتىڭ ساناسىنا ءسىڭىرۋ وتە ماڭىزدى. دومبىرا اسپابى قايتالانباس اسىل دۇنيە. سوندىقتان مەكتەپتە دومبىرا ۇيرەنۋ ساباقتارىن ەنگىزۋ قاجەتتى ءارى دۇرىس باستاما. سەبەبى قازىرگى جاپپاي جاھاندانۋ ۋاقىتىندا حالقىمىزعا ءتان بىرەگەي قۇندىلىقتاردى جاڭعىرتا بەرۋىمىز كەرەك", - دەدى مەملەكەت باسشىسى.
بۇدان بولەك، قازاقستان پرەزيدەنتى تول مادەنيەتىمىزگە دەگەن قامقورلىق ارقاشان مەملەكەتتىڭ ايرىقشا نازارىندا بولاتىنىن ايتتى.
ء"بىز قازاقتىڭ ءداستۇرلى ءانىن، كۇيىن ەلىمىزگە عانا ەمەس، الەم جۇرتشىلىعىنا تانىتىپ جۇرگەن ونەرپازدارىمىزعا لايىقتى قولداۋ كورسەتە بەرۋىمىز كەرەك. ولار حالقىمىزدىڭ ۇلتتىق بولمىسىن ساقتاۋ ءۇشىن ەڭبەك ەتىپ جۇرگەن ونەر تارلاندارى. دومبىرا بۇكىل قازاقستان حالقىن بىرىكتىرەتىن تەڭدەسى جوق مادەني مۇرا. ۇلتتىق رۋحانياتىمىزدى دارىپتەيتىن مەرەكە دومبىرانىڭ مارتەبەسىن بيىككە كوتەرە بەرسىن! بارشاڭىزعا ۇلكەن راقمەت، امان بولىڭىزدار، قۇرمەتتى اعايىن!", - دەدى مەملەكەت باسشىسى.
"ادىرنا" ۇلتتىق پورتالى
