وبلىستىق جەدەل شتابتىڭ مالىمەتىنشە، توتەنشە جاعداي جاريالانعاننان بەرى قۇلسارى قالاسىنان 12 مىڭ تۇرعىن ەۆاكۋاتسيالاندى. ونىڭ 5 مىڭعا جۋىعى بالالار، - دەپ حابارلايدى "ادىرنا" ۇلتتىق پورتالى قر توتەنشە جاعدايلار مينيسترلىگىنە سىلتەمە جاساپ.
قۇلسارى تۇرعىندارىن ەۆاكۋاتسيالاۋ ءۇش باعىتتا جۇرگىزىلدى: اتىراۋعا، تەڭىز ۆاحتالىق لاگەرىنە جانە ماڭعىستاۋ وبلىسىنىڭ بەينەۋ اۋدانىنا.
"قۇتقارۋ جۇمىستارىن جۇرگىزۋ ءۇشىن ۇلتتىق ۇلاننىڭ تىكۇشاعى اقتوبە وبلىسى توتەنشە جاعدايلار دەپارتامەنتىنىڭ جەكە قۇرامىمەن قۇلسارى قالاسىنا ۇشتى", - دەپ حابارلادى توتەنشە جاعدايلار مينيسترلىگى.
جىلىوي اۋدانىنداعى مەديتسينالىق ۇيىمدار شتاتتىق رەجيمدە جۇمىس ىستەۋدە. بۇل تۋرالى وبلىستىق جەدەل شتابتا حابارلاندى.
"جىلىوي اۋدانىنداعى جاعدايعا قاراماستان، بارلىق مەديتسينالىق ۇيىمدار شتاتتىق رەجيمدە جۇمىس ىستەۋدە. وعان قوسا، دارىگەرلەر مەن جەدەل جاردەم بريگادالارى جۇمىلدىرىلدى. بارلىق ەۆاكۋاتسيالانعانداردى دارىگەرلەر تەكسەرىپ جاتىر", - دەلىنگەن حابارلامادا.
اۋداندا سەنىم تەلەفونى ىسكە قوسىلدى. كومەككە مۇقتاج تۇرعىندار +7 778 249 0253 نومىرىنە حابارلاسا الادى.
بۇعان دەيىن، ءساۋىردىڭ 5-ىنەن 6-سىنا قاراعان ءتۇنى قۇلسارى قالاسىنىڭ 4 مىڭنان استام تۇرعىنى ماڭعىستاۋ وبلىسىنا كوشىرىلگەنىن حابارلاعان بولاتىنبىز.
