جاپونيانىڭ باتىس جاعالاۋىنداعى نوتو تۇبەگىندە بولعان كۇشتى جەر سىلكىنىسىنەن قازا تاپقاندار سانى ارتۋدا. جاپونيانىڭ پرەمەر-ءمينيسترى فۋميو كيشيدا 2 قاڭتاردا قۇربانداردىڭ كوپ ەكەنىن ايتتى، دەپ حابارلايدى “ادىرنا” ۇلتتىق پورتالى.
جەرگىلىكتى بيلىكتىڭ مالىمەتىنشە، كەم دەگەندە 30 ادامنىڭ قازا تاپقانى راستالدى. ەڭ ۇلكەن قيراۋ يسيكاۆا پرەفەكتۋراسىنىڭ ۆادزيما قالاسىندا بولدى. ول جەردە 100-دەن استام ءۇي ورتەنىپ، بىرازى قيرادى. 13 ساعات وتسە دە تۇتانعان ءورتتى تولىق ءسوندىرۋ مۇمكىن بولمادى.
NHK تەلەارناسىنىڭ حابارلاۋىنشا، قالادا سەگىز ادام قازا تاۋىپ، كەمىندە جەتەۋى اۋىر جارالانعان. ايماقتا ىزدەۋ-قۇتقارۋ جۇمىستارى جالعاسۋدا.
ايتا كەتەيىك، 1 قاڭتاردا جاپونيانىڭ ورتالىعىندا ماگنيتۋداسى 7,6 بالدى قۇرايتىن جەر سىلكىنىسى بولدى. جەر سىلكىنىسىنىڭ وشاعى – نوتو تۇبەگى. دەگەنمەن، جاپونيا استاناسى توكيوعا جاقىن جەردە، شامامەن 400 شاقىرىم قاشىقتىقتا ۇيلەردىڭ ءدىرىلى سەزىلدى. جەر استى دۇمپۋلەرى كوشكىندەرگە، جول جابىندارىنىڭ جارىلۋىنا، اعاشتار قۇلاۋىنا اكەلدى.
پرەمەر-مينيستر كيشيدانىڭ ايتۋىنشا، كولىك جولدارى بۇزىلعاندىقتان تۇبەكتىڭ سولتۇستىك بولىگىنە جەتۋ قيىن. قۇتقارۋشىلار وقشاۋلانعان ايماقتارعا تەڭىز ارقىلى جەتۋگە تىرىسادى.
جەر استى دۇمپۋلەرى سەيسەنبى كۇنى تاڭەرتەڭ دە جالعاستى. جاپونيا مەتەورولوگيالىق باسقارماسىنىڭ مالىمەتىنشە، دۇيسەنبىدەن بەرى بارلىعى 155 جەراستى دۇمپۋلەرى تىركەلدى. مەتەورولوگتار اپتا ىشىندە، اسىرەسە الداعى ەكى-ءۇش كۇندە كۇشتى جەر سىلكىنىسى بولۋى مۇمكىن ەكەنىن ەسكەرتەدى.
