نۇر-سۇلتاندا استانا كۇنى تويلانىپ جاتىر

1455

اقمولا – استانا – نۇر-سۇلتان

وسىدان تۋرا 25 جىل بۇرىن ەلوردانى الماتىدان بۇرىنعى اقمولا قالاسىنا كوشىرۋ تۋرالى باستاما كوتەرىلگەن بولاتىن. 1994 جىلى سول كەزدەگى مەملەكەت باسشىسى نۇرسۇلتان نازارباەۆ پارلامەنت وتىرىسىندا وسى يدەيانى جاريالادى. الايدا دەپۋتاتتار ۇسىنىستى بىردەن قابىلدامادى. دەگەنمەن، ءۇش جىلدان كەيىن ەلوردانى اۋىستىرۋ تۋرالى جارلىققا قول قويىلدى. ول كەزدە قالانىڭ اتاۋىن وزگەرتۋ جايىندا اڭگىمە بولعان جوق. اراعا ءبىر جىل سالىپ، 1998 جىلى اقمولا قالاسىنىڭ اتاۋى استانا بولىپ وزگەرتىلدى. سول جىلى 10 ماۋسىمدا استانانىڭ حالىقارالىق تۇساۋكەسەر ءراسىمى ءوتتى.

8 جىل بويى استانا كۇنى ماۋسىمدا اتالىپ كەلدى. ال 2006 جىلدان باستاپ مەيرام 6 شىلدەگە - قازاقستاننىڭ تۇڭعىش پرەزيدەنتى، ەلباسى نۇرسۇلتان نازارباەۆتىڭ تۋعان كۇنىنە اۋىستىرىلدى. بيىل مەملەكەت باسشىسى قاسىم-جومارت توقاەۆتىڭ جارلىعىمەن استانانىڭ اتاۋى نۇر-سۇلتان بولىپ وزگەرتىلدى.

بيىل استانا كۇنىن تويلاۋدا قانداي وزگەرىس بار؟

بيىل استانا كۇنىنە ارنالعان شارالار ءۇش ەسەگە قىسقارىپ وتىر. قالا اكىمىنىڭ ورىنباسارى ەرلان كاناليموۆتىڭ ايتۋىنشا، وسى ۋاقىتقا دەيىن قالا كۇنى اياسىندا 300 شارا ۇيىمداستىرىلسا، اعىمداعى جىلى اتالعان كورسەتكىش 100-گە دەيىن قىسقارتىلدى. باسىم بولىگى تەگىن بولادى. وسىنىڭ بارىنە شامامەن 300-400 ميلليون تەڭگە جۇمسالماق. بۇل قاراجات مادەني-سپورتتىق شارالاردى ۇيىمداستىرۋعا عانا ەمەس، قالانى اباتتاندىرۋعا دا جىبەرىلەدى.

"استانا كۇنى وسىمەن 21 رەت تويلانىپ وتىر. بۇل كۇن ەلوردالىقتاردىڭ عانا ەمەس، بارشا قازاقستاندىقتىڭ سۇيىكتى مەيرامىنا اينالدى. جازعى ۋاقىت، سوسىن بىرنەشە دەمالىس كۇنى بار. قالاعا باسقا وڭىرلەردەن كەلەتىن ادامدار كوپ. ءوزىمىزدىڭ 1,1 ميلليون تۇرعىنىمىز بار. وعان قوسا، شەتەلدىك تۋريستەر كوپ كەلەدى", - دەدى كاناليموۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

نۇر-سۇلتاندا قانداي شارالار وتەدى؟

وسى جولى قازاقستاندىق جانە رەسەيلىك ەسترادا جۇلدىزدارىنىڭ قاتىسۋىمەن وتەتىن OPEN AIR, اشىق اسپان استىنداعى گالا-كونتسەرت، ورتالىق الاڭداردا ۇيىمداستىرىلاتىن جاپپاي ساۋىق-سايراندى وتكىزبەيتىن بولدى. نۇر-سۇلتان قالاسىنىڭ مادەنيەت جانە سپورت باسقارماسى تاراتقان مالىمەتكە سايكەس، قالانىڭ بىرنەشە جەرىندە مادەني-سپورتتىق شارالار ۇيىمداستىرىلادى.

  • بالالار شىعارماشىلىعىنا ارنالعان "شاتتىق" حالىقارالىق فەستيۆالى (قالالىق الاڭ، 10:00);
  • كادەتتەر اراسىنداعى كۇرەس تۇرلەرى بويىنشا ازيا چەمپيوناتى ("داۋلەت" سپورت كەشەنى، 11:00);
  • جاۋىنگەرلىك ونەر فەستيۆالى (جەكپە-جەكتەر سارايى، 15:00);
  • نۇر-سۇلتان اكىمىنىڭ كۋبوگى ءۇشىن كاراوكەدەن چەميونات (ەسىل وزەنىنىڭ جاعاسى، امفيتەاتر، 15:00);
  • ۇرمەلى وركەسترلەر شەرۋى (قالالىق الاڭ، 16:00);
  • بوكس كەشى ("بارىس-ارەنا" مۇز ايدىنى، 17:00);
  • "سوۆرەمەننيك" تەارىنىڭ گاسترولى (بەيبىتشىلىك جانە كەلىسىم سارايى، 17:00);
  • كوشە بيىنە ارنالعان International Street dance Session in Astana فەستيۆالى (قالالىق الاڭ، 19:00);
  • Spirit of Eurasia حالىقارالىق فەستيۆالى (ەكسپو ايماعى، 18:00).

دەرەككوز: sputniknews.kz

"ادىرنا" ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket