Rompetrol مۇناي كومپانياسىنىڭ قىزمەتكەرلەرى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆقا اشىق حات جولدادى. بۇل تۋرالى رۋمىندىق Gândul ينتەرنەت-باسىلىمى جاريالادى، دەپ حابارلايدى “ادىرنا” ۇلتتىق پورتالى.
ايتا كەتەيىك، Rompetrol – “قازمۇنايگاز”-عا تيەسىلى رۋمىنيالىق مۇناي كومپانياسى. 2007 جىلدان باستاپ Rompetrol KMG International نەگىزگى برەندى، كومپانيانىڭ الەمنىڭ بەس ەلىندە جانارماي قۇيۋ ستانتسيالارى جەلىسى بار. KMG International يەلىگىندە – رۋمىنيانىڭ ەكى ءىرى مۇناي وڭدەۋ زاۋىتتارى – Petromidia جانە Vega بار. سونداي-اق پوليمەرلەر وندىرىلەتىن مۇناي-حيميا كەشەنى جۇمىس ىستەيدى. سونىمەن قاتار، كومپانيا مولدوۆا، بولگاريا جانە گرۋزيادا 1100-دەن استام ساۋدا جەلىلەرىن باسقارادى.
باسىلىمنىڭ حابارلاۋىنشا، Rompetrol قىزمەتكەرلەرى KMG International باسشىلىعىن بىلىكسىز جانە سىبايلاس جەمقورلىققا جول بەردى دەپ ايىپتايدى. اشىق حات قاسىم-جومارت توقاەۆتان بولەك، پرەمەر-مينيستر ولجاس بەكتەنوۆكە، ەنەرگەتيكا ءمينيسترى الماسادام ساتقاليەۆكە، «سامۇرىق-قازىنا» اق باسقارما توراعاسى نۇرلان جاقىپوۆقا جانە قمگ باسقارما توراعاسى ماقسۇت ميرزاعاليەۆكە جولداندى.
“كومپانيا باسشىلىق قۇرامىن تۇبەگەيلى وزگەرتۋدى جانە جاڭا قازاقستاننىڭ ماقساتتارىنا ساي كوزقاراسى بار ديرەكتورلار كەڭەسىنەن باستاپ، اتقارۋشى مەنەدجمەنتكە دەيىنگى بارلىق دەڭگەيدە جاڭا ادامداردى تارتۋدى تالاپ ەتەدى”، دەپ جازعان باسىلىم.
اشىق حاتتا Rompetrol قىزمەتكەرلەرى ۇيىمنىڭ باسشىلىعىنا دا كوڭىلى تولمايتىنىن جازادى.
اقپاراتقا سايكەس، ءىلياس قۇلجانوۆ رەسەي ازاماتتىعىنا يە بولعان، بىراق ەۋروپالىق وداق تاراپىنان بولۋى مۇمكىن سانكتسيالاردان قۇتىلۋ ءۇشىن رۋمىنيا بيلىگىنە ءوزىنىڭ قازاقستان ازاماتى ەكەنىن ايتقان. ۆەب-سايتتا KMG International باسشىسىنا تيەسىلى رەسەي فەدەراتسياسى ازاماتىنىڭ شەتەلدىك تولقۇجاتىنىڭ فوتوسۋرەتى بار.
فوتو: Gândul
سونداي-اق، تىلشىلەر “ولار نوۆوروسسيسكىدەگى كقك تەرمينالى ارقىلى رۋمىنياعا جەتكىزىلەتىن قازاق مۇنايى تەوريالىق تۇرعىدان رەسەيلىك بولۋى مۇمكىن” دەگەندى العا تارتىپ وتىر.
«حات اۆتورلارى ءىلياس قۇلجانوۆتى وتە قابىلەتسىز ادام دەپ اتايدى. ولاردىڭ ايتۋىنشا، Rompetrol-دا جاڭا توپ-مەنەدجەرلەر شىعۋ تەگى مەن تۋىستىق بايلانىسى بويىنشا، ناقتى قۇزىرەتتىلىك ەسكەرىلمەي تاعايىندالادى. ال تاجىريبەلى ماماندار جۇمىستان كەتۋگە ءماجبۇر. وسىعان بايلانىستى رۋمىندىق كومپانيانىڭ نىساندارىندا اپاتتار مەن جارىلىستار بولدى»، – دەپ كەلتىردى ماقالا اۆتورلارى.
سونداي-اق، رۋمىنيا مەن قازاقستان ءۇشىن ستراتەگيالىق ماڭىزدى كومپانيادا قارجىلىق رەسۋرستاردى يەمدەنۋ ءۇشىن سىبايلاس جەمقورلىق سحەمالارى بارلىق دەڭگەيدە قولدانىلاتىنى ايتىلدى.
اشىق حاتتا 2023 جىلدىڭ قارجىلىق ناتيجەلەرى كومپانيانىڭ بانكروتقا ۇشىراعانىن انىق كورسەتەدى.
Rompetrol قىزمەتكەرلەرى قاسىم-جومارت توقاەۆتان كومپانيانىن ساقتاپ قالۋ ءۇشىن شارا قولدانۋدى سۇراپ، رۋمىنيا بيلىگىنە دە وسىنداي ءوتىنىش جىبەرىلەتىنىن حابارلادى.
ايتا كەتەيىك، KMG International كومپانياسىنىڭ رۋمىنيالىق ەنشىلەس ۇيىمى Rompetrol Rafinare 2023 جىلى 270 ميلليون دوللار شىعىنعا باتقان. بۇل تۋرالى كومپانيا تاراتقان ءباسپاسوز حابارلاماسىندا جازىلدى.
كومپانيانىڭ 2023 جىلعى جالپى اينالىم قاراجاتى 5,3 ملرد دوللاردى قۇرادى. بۇل 2022 جىلمەن سالىستىرعاندا 19%-عا از. وپەراتسيالىق پايدا (EBITDA) $201 ملن، ال تازا ناتيجە تەرىس (-270,5 ملن دوللار). بۇل شىعىننىڭ 82%-ى (-223 ميلليون دوللار) وپەراتسيالىق اكتيۆتەردىڭ قۇنسىزدانۋىنا بايلانىستى بولدى.
