ءيزرايلدىڭ يەرۋساليم قالاسىندا حاماس-تىڭ كەپىلگە العان ادامداردى تەز ارادا قايتارۋىن تالاپ ەتكەن، ۇكىمەتكە قارسى شەرۋى ءوتتى، دەپ حابارلايدى "ادىرنا" ۇلتتىق پورتالى.
يزرايلدىك باق-تىڭ مالىمەتىنشە، نارازىلىق بىلدىرۋشىلەر پرەمەر-مينيستر بەنيامين نەتانياحۋدى اۋىستىرۋدى تالاپ ەتتى. ولاردىڭ پىكىرىنشە ول كەپىلگە الىنعانداردى بوساتۋ ءۇشىن «مامىلە جاساسۋعا كەدەرگى بولىپ وتىر».
نارازىلىق شارالارى ءۇشىنشى كۇن قاتارىنان جالعاسىپ جاتقانىن، كەپىلگە الىنعانداردىڭ تۋىستارى بۇعان دەيىن دە ميتينگىلەر وتكىزگەنى ايتىلدى. سوڭعى شەرۋ كەزىندە كەيبىر نارازىلىق بىلدىرۋشىلەر قولدارىنا الاۋ الىپ، كەيبىرەۋلەرى نەتانياحۋدىڭ ۇيىنە بارعان. ال ايماقتا تارتىپسىزدىكتەر مەن پوليتسيامەن قاقتىعىستار باستالدى. ءتارتىپ ساقشىلارى كەم دەگەندە بەس نارازىلىق ءبىلدىرۋشىنى ۇستادى.
"كەيبىرەۋلەر تارتىپسىزدىك جاساپ، پرەمەر-ءمينيستردىڭ ۇيىنە بارۋعا تىرىستى. پرەمەر-ءمينيستردىڭ ۇيىنە ەشقانداي قاۋىپ ءتونىپ تۇرعان جوق", - دەدى پوليتسيا وكىلدەرى.
ۆەدومستۆونىڭ مالىمەتىنشە، وقيعا كەزىندە ءتارتىپ ساقشىلارىنىڭ ءبىرى جارالانعان.
سونداي-اق نارازىلىق بىلدىرۋشىلەر كنەسسەتتەن (پارلامەنت) جاياۋ ءجۇرىپ، نەتانياحۋ رەزيدەنتسياسى ورنالاسقان ايماقتا وعان جەتۋ ءۇشىن ەكىگە بولىنگەنى حابارلاندى. پوليتسيا بارريكادالار ورناتۋعا تىرىستى.
ەسكە سالا كەتەيىك، وتكەن جىلدىڭ قاراشاسىندا يزرايل مەن حاماس ۋاقىتشا بىتىمگە كەلدى، ونىڭ ىشىندە يزرايلدىك كەپىلگە الىنعانداردى يزرايلدە تۇرمەدە وتىرعان پالەستينالىقتارعا ايىرباستاۋ تۋرالى كەلىسىم جاسالعان. 7 قازاندا حاماس تۇتقىنداعان 250-گە جۋىق تۇتقىن كەپىلگە بوساتىلدى. الدىن الا مالىمەتتەر بويىنشا، حاماس باقىلاۋىنداعى اۋماقتا 130-عا جۋىق كەپىلگە الىنعان ادام بولۋى، ولاردىڭ كەيبىرى قازا تابۋى مۇمكىن.
