ءيزرايلدىڭ گازا سەكتورىنداعى اسكەري ناۋقانى كەزىندە مىڭداعان شەتەل ازاماتى سوعىس قيمىلدارىنا قاتىسقان. بۇل تۋرالى Al Jazeera باسىلىمىنىڭ اناليتيكالىق ماتەريالىندا ايتىلادى، دەپ حابارلايدى «ادىرنا» ءتىلشىسى.
باسىلىم دەرەگىنشە، يزرايل جاعىندا 189 قازاقستان ازاماتى سوعىسقان. ودان بولەك، 264 وزبەكستاندىق، 52 قىرعىزستاندىق، 31 تۇركىمەنستاندىق پەن 8 تاجىكستان ازاماتى اتالعان.
جاريالانىمدا يزرايل قورعانىس ارمياسىنداعى اسكەري قىزمەتكەرلەردىڭ ەداۋىر بولىگىنىڭ قوس ازاماتتىعى بار ەكەنى اتاپ وتىلگەن.
كەمىندە 12-13 مىڭ اسكەري قىزمەتكەردە اقش ازاماتتىعى بار ەكەنى كورسەتىلگەن جانە بۇل ەڭ ءىرى توپ سانالادى. سونداي-اق فرانتسيا مەن رەسەي ازاماتتارىنىڭ سانى دا ايتارلىقتاي كوپ. ول شامامەن 5–6 مىڭ ادامدى قۇرايدى. ۇلىبريتانيا، گەرمانيا جانە ۋكراينا ازاماتتارى 1000-نان اسادى.
اۆتورلار كەيبىر شەتەلدىك يزرايل ارمياسىندا تۇراقتى نەگىزدە قىزمەت ەتسە، ەندى ءبىر بولىگى قاقتىعىس ۋشىعىپ كەتكەننەن كەيىن ەلگە كەلگەنىن اتاپ وتەدى.
ماتەريالدا حالىقارالىق گۋمانيتارلىق قۇقىق نورمالارى بۇزىلعان دەپ تانىلعان جاعدايدا شەتەل ازاماتتارىنىڭ ىقتيمال زاڭدىق جاۋاپكەرشىلىگى تۋرالى ماسەلە كوتەرىلەدى.
قۇقىق قورعاۋ ۇيىمدارى اسكەري قىزمەتكەرلەر شىققان ەلدەردە تەرگەۋ جۇرگىزىپ، جاۋاپكەرشىلىككە تارتۋ قاجەتتىگىن اتاپ وتەدى. الايدا بىرقاتار مەملەكەتتىڭ رەسمي ورگاندارى مۇنداي شارالاردىڭ باستالعانى جونىندە اشىق مالىمدەمە جاساعان جوق.
گازا قاقتىعىسى حالىقارالىق دەڭگەيدە وتكىر تالقىلانىپ وتىر، ال شەتەل ازاماتتارىنىڭ سوعىسقا قاتىسۋى ديپلوماتيالىق ءارى قۇقىقتىق داۋلار تۋعىزۋدا.
