يران پرەزيدەنتى يبراگيم رايسي پالەستينا-يزرايل قاقتىعىس ايماعىنداعى جاعدايعا قاتىستى مالىمدەمە جاساپ، حاماستى قولدايتىنىن ءبىلدىردى. بۇل تۋرالى جەرگىلىكتى Mehr News باسىلىمى جاريالادى، دەپ حابارلايدى “ادىرنا” ۇلتتىق پورتالى.
رايسي الەمدى پالەستينا حالقىنا جاسالىپ جاتقان قىسىم مەن ادىلەتسىزدىككە نازار اۋدارۋعا شاقىردى.
ول پالەستينالىقتاردىڭ ارەكەتىن قورعانىس دەپ اتادى.
يران پالەستينا ەلىنىڭ زاڭدى قورعانىسىن قولدايدى. سيونيستىك رەجيم مەن ونىڭ قولداۋشىلارى ايماق ەلدەرىنىڭ قاۋىپسىزدىگىنە قاتەر توندىرۋىنە جاۋاپتى جانە ولار بۇل ءۇشىن جاۋاپ بەرۋى كەرەك، دەلىنگەن مالىمدەمەدە.
ەسكە سالايىق، سەنبى كۇنى تاڭەرتەڭ يزرايل گازا سەكتورىنان زىمىران اتقىلاعان. پالەستينالىق حاماس سودىرلار توبى بۇل شابۋىلدى ءوز موينىنا الىپ، «ءال-اقسا داۋىلى» وپەراتسياسىنىڭ باستالعانىن جاريالادى.
ءوز كەزەگىندە يزرايل قورعانىس كۇشتەرى گازا سەكتورىنداعى حاماس نىساندارىنا سوققى بەرىپ جاتقانىن مالىمدەدى. «تەمىر قىلىشتار» لاڭكەستىككە قارسى وپەراتسياسى باستالدى.
كەيىن يزرايل پرەمەر-ءمينيسترى نەتانياحۋ بۇل ەلدىڭ شابۋىلعا باتىل جاۋاپ بەرەتىنىن قايتالاپ، گازالىقتاردى تەز ارادا قالانى تاستاپ كەتۋگە شاقىردى. ونىڭ ايتۋىنشا، ارميا «بارلىق جەردە تولىق كۇشپەن ارەكەت ەتەتىن بولادى».
كەشە يزرايل ۇكىمەتى ەلدىڭ سوعىس جاعدايىنا وتكەنىن رەسمي تۇردە حابارلادى.
بۇگىن پالەستينا-يزرايل قاقتىعىس ايماعىنداعى جاعدايعا بايلانىستى بۇۇ قاۋىپسىزدىك كەڭەسىنىڭ جابىق وتىرىسى وتكەنى بەلگىلى بولدى، بىراق قاۋىپسىزدىك كەڭەسى مۇشەلەرى ەشقانداي مالىمدەمە قابىلداي الماعان.
بولىپ جاتقان جايتقا بايلانىستى قازاقستاننىڭ سىرتقى ىستەر مينيسترلىگىنىڭ رەسمي وكىلى مينيسترلىك يزرايلدەگى قازاقستاندىقتاردىڭ وتانىنا ورالۋى ءۇشىن ءتىزىمىن جاساپ جاتقانىن ايتتى.
