بۇگىن ۇكىمەت وتىرىسىنان كەيىن سۋ تاسقىنىنا بايلانىستى ءباسپاسوز ءماسليحاتى ءوتتى، دەپ حابارلايدى "ادىرنا" پورتالى.
جيىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆكە «ءسىزدى جامبىل وبلىسى اكىمى بولعاننان بەرى جاقسى بىلەمىز. ول جاقستا دا ءوزىڭىز ىسكەر اكىم رەتىندە كورىنە قويعان جوقسىز. سۋ ءمينيسترى رەتىندە لاۋازىمدى قىزمەت اتقارىپ جاتىرسىز. كەشە پرەزيدەنتتەن سوگىس ەستىدىڭىز. ءسىز ءوزىڭىزدى سۋ ءمينيسترى بولۋعا لايىقتىمىن دەپ ەسەپتەيسىز بە؟» دەگەن سۇراق قويىلدى.
- ءوزىڭىز دۇرىس ايتتىڭىز. بۇگىنگى كۇنى پرەزيدەنت تاراپىنان تارتىپتىك جاۋاپكەرشىلىككە تارتىلدىق. ارى قاراي وسى جۇمىسقا لايىقتى نەمەسە لايىقتى ەمەس ەكەنىم بويىنشا پرەزيدەنت شەشىم قابىلدايدى. ءبىز جۇمىستى قالاي اتقارىپ جاتقانىمىزدى پرەزيدەنت باعالايدى، - دەگەن مينيستر جاۋابىندا حالى، ەل الدىنداعى جاۋاپكەرشىلىك تۋرالى توقتالىپ جاتپادى.
- بۇگىنگى كۇنى مينيسترلىكتىڭ جۇمىسى توتەنشە جاعدايعا بايلانىستى ونىڭ سالدارىن جويۋعا باعىتتالىپ وتىر. التى ايدىڭ ىشىندە ءبىز قۇقىقتىق بازانى قالىپتاستىردىق. بۇگىنگى ءار جەرگىلىكتى اتقارۋشى ورگانمەن قانداي جۇمىستاردى اتقارۋىمىز كەرەك، قانداي كولەمدە ەكەنى جايلى جوسپارلارىمىز بار. التى ايدىڭ ىشىندە سول اۋقىمدى جۇمىستاردى اتقارۋعا ەشقانداي مۇمكىندىك بولعان جوق. قىركۇيەك ايىنان باستاپ وسى بۇگىنگى كۇنگە دەيىن مۇمكىندىك بولمادى، - دەگەن سۋ ءمينيسترى مينيسترلىك سايتىنداعى مالىمەتتەردى تىزبەلەپ كەتتى.
ونىڭ ايتۋىنشا، بۇگىنگى كۇنى 20 سۋ قويماسىن سالۋ جوسپارلانىپ وتىر.
- مەن باياندامدا ايتىپ كەتكەندەي، 9 سۋ قويمانىڭ جوبالاۋشى جوسپارلارى دايىندالىپ جاتىر. التاۋى ءبىرىنشى جارتى جىلدىقتا دايىن بولادى. ودان بولەك 15 قورعانىستا بار گيدروتەحنيكالىق قۇرىلعىلاردىڭ قايتا جوندەۋ جۇمىستارىن قاراستىرىپ جاتىرمىز. وسى جۇمىستاردىڭ ارقاسىندا 134 ەلدى-مەكەننىڭ، جالپى سانى ەكى ءجۇز مىڭ اساتىن حالىققا سۋدان تونەتىن قاۋىپتى تومەندەتۋگە مۇمكىندىك بولادى. ارينە، وعان ۋاقىت كەرەك. سول جۇمىستاردى جەدەلدەتۋگە كۇش سالىپ جاتىرمىز»، – دەدى ول.
ەسكە سالا كەتەيىك، سالا ءمينيسترى وتكەن اپتادا پرەزيدەنتتەن قاتاڭ سوگىس العان.
