Bügın - kompozitor, dirijer, Halyq ärtısı, Qazaqstannyŋ eŋbek sıŋırgen öner qairatkerı, Qazaqstan Memlekettık syilyǧynyŋ laureaty, Halyq qaharmany Nūrǧisa Tılendievtıŋ tuǧan künı. Äigılı öner qairatkerınıŋ tuǧanyna 99 jyl tolyp otyr.
Ol 1925 jyly 1 säuır künı Almaty oblysy Ile audanynda düniege kelgen.
Almaty konservatoriiasy (qazırgı Qūrmanǧazy atyndaǧy Qazaq ūlttyq konservatoriia) men Mäskeu memlekettık konservatoriiasyn bıtırgen.
1952-1961 jyldary - Abai atyndaǧy Qazaq memlekettık akademiialyq opera jäne balet teatrynyŋ dirijerı, 1960-1964 jyldary - Qazaqtyŋ halyq aspaptar orkestrınıŋ bas dirijerı, 1968-1981 jyldary - «Qazaqfilm» kinostudiiasy muzyka redaksiiasynyŋ bas redaktory. 1981 jyldan «Otyrar sazy» folklorlyq-etnografiialyq ansamblınıŋ ūiymdastyruşysy ärı körkemdık jetekşısı qyzmetterın atqardy.
«Altyn taular» operasynyŋ (Q.Qojamiiarovpen bırge), «Dostyq jolymen» baletınıŋ (L.Stepanovpen bırge), «Orteke» balet-poemasynyŋ, «Menıŋ Qazaqstanym» kantatasynyŋ, orkestrge arnalǧan «Poema», «Ata tolǧauy», «Aqsaq qūlan», «Aqqu», «Arman», «Mahambet», «Köş keruen» poemalary men «Halyq quanyşy», «Qairat», «Jeŋıs saltanaty» atty kırıspelerdıŋ, 400-ge tarta än men romanstyŋ avtory. 50-den astam dramalyq qoiylymǧa, 19 körkem filmge, 17 multiplikasiialyq filmge, 14 derektı-hronikalyq filmge muzyka jazdy. 1998 jyly köz jūmǧan.
Ekı ret Eŋbek Qyzyl Tu ordenımen marapattalǧan. Astana, Almaty qalalarynda Nūrǧisa Tılendiev atyndaǧy köşe bar. Almatyda öner qairatkerıne eskertkış tūrǧyzylǧan.
