اقتوبە وبلىسىندا سۋ تاسقىنىنان زارداپ شەككەندەردىڭ ماتەريالدىق شىعىنىن ەسەپتەيتىن كوميسسيا قۇرىلدى. بۇل تۋرالى وبلىس اكىمى اسحات شاحاروۆ مالىمدەدى، دەپ حابارلايدى “ادىرنا” ۇلتتىق پورتالى.
وبلىس باسشىسى تابيعاتتىڭ ءتىلسىز اپاتتارىنا ەشكىم توسقاۋىل بولا المايتىنىن، جاۋىن-شاشىن جاعدايدى قيىنداتىپ جىبەرگەنىن ايتقان.
"قازىرگى ۋاقىتتا ايماقتا سۋ شايعان جولدار، كوپىرلەر مەن وتكەلدەر، سۋ باسقان ۇيلەر مەن اۋلالار بار. كەشە اۋداندارعا بارىپ كەلدىم، بۇگىن قالانى اياقتاي ءجۇرىپ قاراپ شىقتىم. ماتەريالدىق شىعىندى قۇرىلعان كوميسسيا انىقتايتىن بولادى. تۇرعىندارىمىزعا سابىرلىقتارى ءۇشىن العىسىمدى بىلدىرەمىن. ەشبىر ادام نازاردان تىس قالمايدى",- دەپ اتاپ ءوتتى ءوڭىر باسشىسى.
قازىرگى ۋاقىتتا قالا جانە 12 اۋداننىڭ اكىمدەرى، توتەنشە جاعدايلار دەپارتامەنتىنىڭ قىزمەتكەرلەرى، اسكەري قۇرىلىمدار، پوليتسەيلەر كۇندىز دە، تۇندە دە جۇمىلا جۇمىس ىستەپ جاتىر، كۇشەيتىلگەن تارتىپكە كوشىرىلگەن.
اسحات شاحاروۆ اقتوبەلىكتەردى سابىرلىققا شاقىرىپ، ءبىر-بىرىنە قولداۋ كورسەتۋگە شاقىردى.
