باتىس قازاقستان وبلىسىندا ناۋرىز مەيرامى كەڭىنەن تويلاندى. 22 ناۋرىز كۇنى ورال قالاسىندا مەرەكەلىك ءىس-شارا ءوتتى. قالا تۇرعىندارى مەن قوناقتارى كونتسەرتتىك باعدارلامانى، تەاترلاندىرىلعان قويىلىمداردى تاماشالادى.
ءوڭىر تۇرعىندارىن باتىس قازاقستان وبلىسىنىڭ اكىمى ناريمان تورەعاليەۆ ناۋرىز مەيرامىمەن قۇتتىقتادى.
«بارشا جەرلەستەرىمدى ناۋرىز مەيرامىمەن شىن جۇرەكتەن قۇتتىقتايمىن! ءاز ناۋرىز – ۇلتىمىزدىڭ بولمىسىن، سالت-ءداستۇرىن، ادەت-عۇرپىن، ءتالىم-تاربيەسىن، رۋحانياتىن ايشىقتايتىن مەيرام. بيىل مەملەكەت باسشىسىنىڭ باستاماسىمەن ون كۇن بويى جاڭا فورماتتا تويلانىپ جاتقان ناۋرىز مەيرامى كوپتىڭ كوڭىلىنەن شىقتى.
پرەزيدەنتىمىز كەشەگى قۇتتىقتاۋىندا ەل يگىلىگى جولىندا اتقارىلاتىن جۇمىستارعا دا توقتالدى. وڭىرلەردەگى جىلۋ ورتالىقتارى جانە ينجەنەرلىك جەلىلەر جاڭعىرتىلادى. ەلىمىزدە 12 مىڭ شاقىرىم جول سالىنىپ، جوندەلەدى. 300 مىڭ ادام تابيعي گازدىڭ يگىلىگىن كورە باستايدى. اۋىل جانە اۋدان تۇرعىندارى ءۇشىن جاڭا تۇرعىن ءۇي باعدارلاماسى ىسكە قوسىلادى. الەۋمەتتىك جاعىنان وسال توپتاعى ازاماتتار ءۇشىن نەسيە ءوسىمى 7 پايىزدان اسپايتىن بولادى. جالعا بەرىلەتىن باسپانا سانى بىرنەشە ەسە كوبەيەدى. مۇنىڭ ءبارى حالىقتىڭ تۇرمىس ساپاسىن جاقسارتۋعا ىقپال ەتەدى دەگەن بولاتىن پرەزيدەنت. حالىققا ارنالعان وسىنداي يگى شارالار مىندەتتى تۇردە باتىس قازاقستان ءوڭىرىن دە قامتيدى. ءبىز تۇرعىندارعا قاجەتتى –الەۋمەتتىك، مەديتسينالىق نىسانداردى، جول سالۋدى، تۇرعىن ءۇي قۇرىلىسىن جۇرگىزۋدى جانە تاعى دا باسقا ماڭىزدى جۇمىستاردى جالعاستىراتىن بولامىز»، - دەپ اتاپ ءوتتى ناريمان تورەعاليەۆ.
تۇڭعىش پرەزيدەنت الاڭىنا جينالعان وبلىس تۇرعىندارى كيىز ۇيلەرگە كىرىپ، ءان، كۇي تىڭداپ، ۇلتتىق تاعامداردان ءدام تاتتى.
ناۋرىز مەيرامى باتىس قازاقستان وبلىسىنىڭ ءار اۋدانىندا كەڭىنەن اتالىپ ءوتتى.
