Batys Qazaqstan oblysynda Naýryz meıramy keńinen toılandy. 22 naýryz kúni Oral qalasynda merekelik is-shara ótti. Qala turǵyndary men qonaqtary konerttik baǵdarlamany, teatrlandyrylǵan qoıylymdardy tamashalady.
Óńir turǵyndaryn Batys Qazaqstan oblysynyń ákimi Narıman Tóreǵalıev Naýryz meıramymen quttyqtady.
«Barsha jerlesterimdi Naýryz meıramymen shyn júrekten quttyqtaımyn! Áz Naýryz – ultymyzdyń bolmysyn, salt-dástúrin, ádet-ǵurpyn, tálim-tárbıesin, rýhanııatyn aıshyqtaıtyn meıram. Bıyl Memleket basshysynyń bastamasymen on kún boıy jańa formatta toılanyp jatqan Naýryz meıramy kóptiń kóńilinen shyqty.
Prezıdentimiz keshegi quttyqtaýynda el ıgiligi jolynda atqarylatyn jumystarǵa da toqtaldy. Óńirlerdegi jylý ortalyqtary jáne ınjenerlik jeliler jańǵyrtylady. Elimizde 12 myń shaqyrym jol salynyp, jóndeledi. 300 myń adam tabıǵı gazdyń ıgiligin kóre bastaıdy. Aýyl jáne aýdan turǵyndary úshin jańa turǵyn úı baǵdarlamasy iske qosylady. Áleýmettik jaǵynan osal toptaǵy azamattar úshin nesıe ósimi 7 paıyzdan aspaıtyn bolady. Jalǵa beriletin baspana sany birneshe ese kóbeıedi. Munyń bári halyqtyń turmys sapasyn jaqsartýǵa yqpal etedi degen bolatyn Prezıdent. Halyqqa arnalǵan osyndaı ıgi sharalar mindetti túrde Batys Qazaqstan óńirin de qamtıdy. Biz turǵyndarǵa qajetti –áleýmettik, medıınalyq nysandardy, jol salýdy, turǵyn úı qurylysyn júrgizýdi jáne taǵy da basqa mańyzdy jumystardy jalǵastyratyn bolamyz», - dep atap ótti Narıman Tóreǵalıev.
Tuńǵysh Prezıdent alańyna jınalǵan oblys turǵyndary kıiz úılerge kirip, án, kúı tyńdap, ulttyq taǵamdardan dám tatty.
Naýryz meıramy Batys Qazaqstan oblysynyń ár aýdanynda keńinen atalyp ótti.
