پاۆلودار قالاسىنىڭ اكىمى «اق جولدىڭ» سىنىنان سوڭ قىزمەتىنەن شەتتەتىلدى. باق حابارلاۋىنشا، وبلىس اكىمى وسىنداي شەشىمدى، قالا باسشىسىنىڭ مەملەكەت اقشاسىنا 50 ملن تەڭگەگە پاتەر مەن 6 ملن-عا ەبەن جيھازىن الىپ، «سەنىمنەن ايىرىلعانى» ءۇشىن قابىلداعان.
ايتا كەتسەك، 2019 جىلدىڭ 19 جەلتوقسانىندا «اق جول» فراكتسياسى پاۆلودار، اتىراۋ، وسكەمەن، شىمكەنت، كوكشەتاۋ، باتىس قازاقستان وبلىسى اقساي اۋدانى، الماتى وبلىسىنىڭ جامبىل اۋدانى شەنەۋنىكتەرىنىڭ مەملەكەت قارجىسىنا ءۇي الۋ ماسەلەسىنە بايلانىستى پرەمەر-مينيسترگە ساۋال جولداعان بولاتىن.
سولاردىڭ ىشىندەگى سويقانى – پاۆلودار اكىمىنىڭ 50 ملن تەڭگەگە العان 230 م2 كولەمىندەگى پاتەرى مەن تاعى دا جالپى سوماسى 226 ملن تەڭگەنى قۇرايتىن بەس پاتەر الۋى بولدى.
«يپوتەكانى تولەۋ ءۇشىن مىڭداعان ازاماتتارىمىز وزدەرىن قارجىلىق جاعىنان شەكتەۋگە ءماجبۇر. «7-20-25» باعدارلاماسىنىڭ وزىندە پاتەر قۇنىنىڭ شەكتەۋى كورسەتىلگەن – بۇل جاعدايدا كەي شەنەۋنىكتەردىڭ سانقۇمارلىعى سۇراق تۋىنداتادى. ءدال سول پاۆلودار وبلىسىنداعى «7-20-25» باعدارلاماسى بويىنشا باسپانانىڭ شەكتى باعاسى – 15 ملن، ال اكىمدىك بولسا ءوز ۇيلەرىن بۇدان 3,5 ەسە باعاعا الىپ وتىر»، – دەلىنگەن مەرۋەرت قازبەكوۆانىڭ دەپۋتتاتىق ساۋالىندا.
ءبىر اپتا بۇرىن، وسى جىلدىڭ 21 ماۋسىمىنداعى پارلامەنت پالاتالارىنىڭ وتىرىسىندا «اق جول» فراكتسياسىنىڭ كوشباسشىسى ازات پەرۋاشەۆ شەنەۋنىكتەردى ىسىراپشىلدىعى ءۇشىن تاعى دا سىنعا العان ەدى. سول پاۆلوداردا تروپيكالىق اعاشتان جاسالعان اكىم كەڭسەسىنىڭ جيھازىنا 10 ملن تەڭگە كولەمىندەگى ساۋداعا تەندەر وتكىزىلگەن. قالا اكىمىنىڭ «تىلەگىنىڭ» ەرەكشە بولعانى سونشالىق، دەپۋتات العاشىندا اكىمدىكتىڭ ءوتىنىمىن دۇرىس تۇسىنە العان جوق: «مەملەكەتتىك ورگاندار مەن ۇلتتىق كومپانيالار اسىرا ءومىر ءسۇرىن جالعاستىرۋدا... ايماق باسشىلارى بيۋدجەت قاراجاتىنا قالاعان نارسەسىن الۋدا – ءزاۋلىم ۇيلەر، قىمبات كولىكتەر، ەبەن اعاشىنىڭ جيھازى.
مۇمكىن جەتەر؟ باي ءومىر سۇرگىلەرىڭىز كەلسە – بيزنەسكە بارىپ، اقشا تابىڭىزدار. ال مەملەكەتتىك قىزمەتكەر ءاربىر تيىندى ۇنەمدەۋى ءتيىس».
سول كەزدە ازات پەرۋاشەۆ پرەمەر-مينيسترگە حات جازىپ، ونىڭ ىسكەرلىك قاسيەتتەرىن ەسكەرە وتىرىپ، بيۋدجەت قاراجاتىن پايدالانۋعا بايلانىستى ماسەلەلەردى رەتتەۋدى سۇراعان ەدى.
كورىپ وتىرعانىمىزداي، جاڭا ۇكىمەت دەپۋتاتتاردىڭ نارازىلىعىنا قۇلاق اسا باستادى.
«اق جول» پارتياسى مەن ونىڭ دەپۋتاتتىق فراكتسياسى سايلاۋالدى باعدارلامانى جۇزەگە اسىرۋ جۇمىستارىن جانە سايلاۋشىلاردىڭ تالاپتارىن ورىنداۋدى جالعاستىرۋدا.
"اق جول" پارتياسىنىڭ ءباسپاسوز قىزمەتى
