قازىرگى ىشكى ىستەر ءمينيسترى ەرجان سادەنوۆ ىشكى ىستەر مينيسترلىگىنىڭ بۇرىنعى باسشىسى ەرلان تۇرعىمباەۆقا قاتىستى قىلمىستىق ءىس قوزعالعانىن راستادى، دەپ حابارلايدى “ادىرنا” ۇلتتىق پورتالى.
«ىشكى ىستەر مينيسترلىگى مۇنى تەكسەرىپ جاتقان جوق، سوندىقتان بۇل جەردە قۇزىرلى ورگاندار قانداي ءىس، قانداي باپ بويىنشا تەرگەۋ اشقانى تۋرالى تۇسىنىكتەمە بەرە المايمىن، ماسەلە سولاردىڭ ەنشىسىندە»، - دەدى سادەنوۆ سارسەنبىدە ءماجىلىس الاڭىندا.
عالامتوردا تاراعان اقپاراتقا سايكەس، تۇرعىمباەۆ قاڭتار وقيعاسى بويىنشا باس پروكۋراتۋرانىڭ تەرگەۋىنە تۇسكەن.
تۇرعىمباەۆ ىشكى ىستەر مينيسترلىگىن 2019 جىلدىڭ اقپان ايىنان باستاپ باسقاردى جانە قاڭتار وقيعاسىنان كەيىن كوپ ۇزاماي – 2022 جىلدىڭ 25 اقپانىندا قىزمەتىنەن بوساتىلدى. ودان كەيىن 2022 جىلدىڭ 17 تامىزىنا دەيىن التى ايعا جۋىق پرەزيدەنت كەڭەسشىسى بولدى، ال 2023 جىلدان باستاپ شانحاي ىنتىماقتاستىق ۇيىمىنىڭ ايماقتىق تەرروريزمگە قارسى قۇرىلىمىنىڭ (اتقق شىۇ) كەڭەسشىسى رەتىندە تىركەلگەن.
