قازاقستان 2027 جىلعا قاراي رەسەيدەن ەلەكتر ەنەرگياسىن يمپورتتاۋدان تولىق باس تارتۋدى جوسپارلاپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى ەنەرگەتيكا ۆيتسە-ءمينيسترى سۇڭعات ەسىمحانوۆ مالىمدەدى.
ونىڭ ايتۋىنشا، بۇل ماقساتقا 2026 جىلدىڭ سوڭى مەن 2027 جىلدىڭ باسىندا جوسپارلانعان ەنەرگەتيكالىق نىساندار ۋاقىتىلى ىسكە قوسىلعان جاعدايدا قول جەتكىزۋ مۇمكىن.
2024 جىلى ەنەرگەتيكانىڭ تاپشىلىق كولەمى 2,1 ملرد كۆت·ساعاتتى قۇراسا، 2025 جىلى شامامەن 1,5 ملرد كۆت·ساعاتقا دەيىن ازايعان. ال 2026 جىلى بۇل كورسەتكىش 1–1,2 ملرد كۆت·ساعات دەڭگەيىندە بولادى دەپ بولجانۋدا. ۇكىمەت 2027 جىلعا قاراي بۇل تاپشىلىقتى تولىق جويۋدى كوزدەپ وتىر.
ۆيتسە-ءمينيستردىڭ ايتۋىنشا، قازاقستان رەسەيدەن ەلەكتر ەنەرگياسىن ساتىپ الا وتىرىپ، قىس مەزگىلىندە قىرعىزستانعا ەلەكتر قۋاتىن ەكسپورتتايدى. بۇل كورشى ەلدىڭ سۋ قويمالارىندا سۋ جيناۋىنا مۇمكىندىك بەرىپ، جاز ايلارىندا قازاقستاننىڭ وڭتۇستىك وڭىرلەرىن سۋارمالى سۋمەن قامتاماسىز ەتۋگە جاعداي جاسايدى.
ەنەرگەتيكالىق تاۋەلسىزدىككە قول جەتكىزۋ ماقساتىندا ەلىمىزدە ينۆەستيتسيالىق باعدارلاما جۇزەگە اسىرىلىپ جاتقانى ايتىلدى. ەنەرگەتيكا ءمينيسترى ەرلان اقكەنوۆ مالىمەتىنشە، جالپى قۋاتى 15,3 گۆت بولاتىن 82 جوبا ىسكە اسىرىلىپ جاتىر. جوبالاردىڭ جالپى ينۆەستيتسيا كولەمى 13 ترلن تەڭگەدەن اسادى.
