بۇگىن ونەركاسىپ جانە قۇرىلىس مينيسترلىگى ۋتيليزاتسيا الىمى تۋرالى پەتيتسيانى قاراۋ جونىندەگى جۇمىس توبىنىڭ وتىرىسى وتپەگەنىن مالىمدەدى، دەپ حابارلايدى “ادىرنا” ۇلتتىق پورتالى.
ۆەدومستۆونىڭ مالىمەتىنشە پەتيتسيانىڭ باستاماشىلارى وتىرىسقا قاتىسۋدان باس تارتقان.
"ونەركاسىپ جانە قۇرىلىس مينيسترلىگىنىڭ عيماراتىنا – ستراتەگيالىق نىسانعا كىرۋ رەگلامەنتىنە سايكەس كەلۋشىلەر ۇيالى تەلەفوندارىن كىرەبەرىستە قالدىرۋعا ءتيىس. الايدا ءوتىنىشتىڭ باستاماشىسى سانجار بوقاەۆ جانە ونىڭ وكىلدەرى رەگلامەنت تالاپتارىن ورىنداۋدان جانە جۇمىس توبىنىڭ وتىرىسىنا قاتىسۋدان باس تارتتى", - دەپ جازىلعان حابارلامادا.
مينيسترلىك بارلىق مۇددەلى تاراپ شاقىرىلعانىن، جۇمىس وتىرىسىنىڭ ءتۇسىرىلىمى جانە وتىرىستىڭ حاتتاماسى قامتاماسىز ەتىلگەنىن اتاپ ءوتتى.
"وتىرىسقا قاتىسۋ ءۇشىن پارلامەنت دەپۋتاتتارى، ونەركاسىپ ۆيتسە-مينيسترلەرى، باسقا دا مەملەكەتتىك ورگانداردىڭ وكىلدەرى جينالدى. وڭىرلەردەن قوعام بەلسەندىلەرى كەلدى. الايدا ءبىز جوسپارلانعان ءىس-شارانى توقتاتۋعا ءماجبۇر بولدىق، ويتكەنى پەتيتسيانىڭ باستاماشىسى وعان قاتىسۋدان باس تارتىپ، مينيسترلىكتىڭ جۇمىس توبىنىڭ وتىرىسىنان كەيىن بەينەجازبانى ۇسىنۋىنا كەلىسپەدى", ― دەدى وقم ءباسپاسوز قىزمەتى.
24 مامىردا E-Petition.kz رەسمي پورتالىندا جاريالانعان ۋتيلالىمعا قاتىستى پەتيتسياعا قول قويعاندار سانى 50 مىڭنان اسقان.
پرەزيدەنت توقاەۆ 2023 جىلى قازان ايىندا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق باقىلاۋ، اكىمشىلىك راسىمدەردى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىنا قول قويعان.
بۇل زاڭ بويىنشا، 50 مىڭنان اسا داۋىس جيناعان پەتيتسيانى ۇكىمەت قاراۋعا ءتيىس.
