باس پروكۋراتۋرا ىشكى ىستەر ەكس-ءمينيسترى ەرلان تۇرعىمباەۆتى جانە پوليتسيا ورگاندارىنىڭ باسقا دا باسشىلارىن قىلمىستىق قۋدالاۋ تۋرالى ءتۇرلى Telegram-ارنالاردا تاراتىلعان اقپاراتقا قاتىستى تۇسىنىك بەردى، دەپ حابارلايدى “ادىرنا” ۇلتتىق پورتالى.
بۇعان دەيىن تەلەگرام-ارنالاردا بۇرىنعى ىشكى ىستەر مينيستر ەرلان تۇرعىمباەۆقا قاتىستى قىلمىستىق ءىستىڭ قوزعالعانى تۋرالى اقپارات تارادى. باس پروكۋراتۋرا بۇل اقپاراتتى راستاعان جوق، بىراق ەكس-مينيستردەن قاڭتار وقيعالارى بويىنشا جاۋاپ الىنعانىن حابارلادى.
باس پروكۋراتۋرانىڭ مالىمەتىنشە، سول كەزدە ادامداردى ازاپتاۋ فاكتىلەرى بولعان. ونى جاساعانى ءۇشىن وبلىستىق پوليتسيا جانە ۇلتتىق قاۋىپسىزدىك ورگاندارىنىڭ بىرقاتار باسشىلارى مەن قىزمەتكەرلەرى سوتتالدى. بىراق تەرگەۋ شارالارى ءالى جالعاسىپ جاتىر.
"جۇرگىزىلىپ جاتقان تەرگەپ-تەكسەرۋلەر شەڭبەرىندە ىشكى ىستەر ەكس-ءمينيسترى ەرلان تۇرعىمباەۆتان جاۋاپ الىندى. سونداي-اق، باس پروكۋراتۋرا الماتى وبلىسى قاراساي اۋدانى قوشمامبەت اۋىلىندا ورنالاسقان ارنايى قابىلداۋ جاعدايىندا ۇستالعان ازاماتتارعا ازاپتاۋدى قولدانۋ تۋرالى ءىس بويىنشا دالەلدەمەلەر جينادى", - دەلىنگەن رەسمي حابارلامادا.
16 ناۋرىزدا وسى قىلمىستى جاساعانى ءۇشىن قاراساي اۋدانىنىڭ ارنايى قابىلداۋ ورىنى جانە پوليتسيا باسقارماسىنىڭ بۇرىنعى باسشىلارى قاماۋعا الىندى.
بۇدان بولەك، قىزمەتتىك اتىس قارۋىن ۇرلاۋ فاكتىلەرى بويىنشا تالدىقورعان قالاسى پوليتسيا باسقارماسىنىڭ بۇرىنعى باسشىلىعىنا قاتىستى تەرگەۋ اياقتالعان جوق.
ايتا كەتسەك، جەلىدە تاراعان اقپارات بويىنشا ەكس-مينيستر ەرلان تۇرعىمباەۆتان كاۋگەر رەتىندە جاۋاپ الىنىپ جاتىر.
