تەڭىزدەگى تولقۋعا قىز كىنالى مە؟

3871
Adyrna.kz Telegram

تەڭىز تولقىپ بارىپ، باسىلدى. حالىقتىڭ اشۋىن باسۋ ءۇشىن بيلىك تە ارتقا قادام جاسادى. رەسمي اقپاراتتاردا تارالىپ جۇرگەندەي توبەلەسكە ليۆيا ازاماتى ەلي داۋد پەن قازاق قىزىنىڭ تۇسكەن فوتوسى سەبەپ بولدى-مىس. بيلىك تە وسى ۆەرسياعا كوپ باسىمدىق بەردى. ارتىنان تىكەلەي ەفيردە جىنىستىق قاتىناسقا تۇسكەن اراب جىگىتى مەن قازاق قىزى دەلىنگەن ۆيدەو الەۋمەتتىك جەلىدە كەڭ تاراعان بولاتىن. ماسەلەنىڭ انىعى قالاي بولدى؟

اتىراۋلىق مۇنايشىلاردىڭ ايتۋىنشا، ماسەلە الەۋمەتتىك ادىلەتسىزدىك پەن تۇرمىستىق تەڭسىزدىكتە. "شەت ەلدىك جۇمىسشىلار مەن جەرگىلىكتى ۇلت وكىلدەرىنىڭ جالاقى مولشەرىنىڭ ايىرماشىلىعى، تاماق ىشەتىن كەزدە شەت ەلدەن كەلگەندەردىڭ قازاقتارمەن بىرگە وتىرمايتىنى، بۇكىل قارا جۇمىستى جەرگىلىكتى ۇلت وكىلى ىستەسە دە ماردىمسىز جالاقى الاتىنى، كەلىمسەكتەردىڭ بوتەن جەردە تالتاڭداپ جۇرگەنىمەن قويماي، جەر يەسى قازاقتاردى ادام ەكەن دەپ كوزگە ىلمەۋى كوپتەن بەرى كەۋدەگە زاپىران بولىپ جينالعان بولاتىن" دەيدى بىزگە اتى-ءجونىن ايتۋدان باس تارتقان مۇنايشى.

ءوزىن "تەڭىزشەۆرويل" كومپانياسىندا جۇمىس ىستەيمىن دەپ تانىستىرعان اتى-ءجونىن ايتپاعان جۇمىسشىلاردىڭ ءبىرى 29 ماۋسىمدا "ازاتتىق" راديوسىنا "15 مىڭ جۇمىسشىنىڭ نارازىلىققا شىققانىن" ايتقان بولاتىن.

"نەگىزى جۇمىسشىلار باياعىدان-اق جالاقىنى تالاپ ەتىپ، ىزالانىپ جۇرگەن ەدى. مىنا سۋرەتتەن كەيىن قاتتى اشۋلانىپ، شىداماي كەتتى" دەيدى ول.

ونىڭ ۇستىنە 29 ماۋسىمدا تاڭەرتەڭ «اراب تەكتى قىزمەتكەرلەر قاتارىنداعى سسەر جشس وكىلدەرىنىڭ ەلي داۋدتىڭ جۇمىستان شىعارىلۋىنا بايلانىستى قازاقستاندىق جۇمىسشىلاردىڭ ەڭبەك ءتارتىبىن باقىلاۋدى كۇشەيتۋ تۋرالى پىكىرلەرى قازاقستاندىق جۇمىسشىلاردىڭ نارازىلىعىن تۋدىرعان.

ءوز جەرىندە وگەي بالانىڭ كۇيىن كەشكەن جەرگىلىكتى مۇنايشىلار مۇنداي ادىلەتسىزدىككە قاشانعى ءتوزسىن؟ ەگەر، قىزعا بايلانىستى جۇرت كوتەرىلسە وندا ەليدى عانا جازالاۋشى ەدى. بۇل جەردە توبەلەس ارابتاردىڭ جۇمىستان بوساتىلعان ەليدى قولداپ، جەرگىلىكتى قازاقتارعا ايبات شەككەنىنەن باستالعان سەكىلدى. پروكۋراتۋرانىڭ رەسمي مالىمدەمەسى دەلىنگەن الەۋمەتتىك جەلىدەگى قۇجاتتا سولاي دەيدى.

ءبىزدىڭ قوعام اقپاراتتىق شابۋىلدان قانشالىقتى قورعالعان؟ نەگە ديزينفورماتسياعا ءجيى سەنىپ قالا بەرەمىز؟ ناقتى دا، انىق اقپارات بيلىك وكىلدەرىنىڭ نەمەسە رەسمي تۇلعالاردىڭ اۋزىنان ۋاقىتىندا ايتىلماعاندىقتان، جۇرت الىپ-قاشپا اڭگىمەنى شىندىق رەتىندە قابىلدايتىن بولادى. كەشەگى ارىس وقيعاسىندا دا سولاي بولعان بولاتىن.

مىسالى، تىكەلەي ەفيردە جىنىستىق قاتىناسقا تۇسكەن قىز قازاق ەمەس ەكەن. سوققىعا جىعىلدى دەگەن قىز رەسەيلىك كۋرسانت قىز كارينا وروەۆا بولىپ شىقتى.

 

ارتىنان جەلىدە جەلدەي ەسكەن "سسەر كومپانياسىنان 237 اراب، 780 قىتاي، 578 ءۇندى جۇمىستان ءبىرجولا شىعارىلىپ، ورنىنا قازاقستان ازاماتتارى الىناتىن بولدى. ۆاحتالىق قالاشىقتا جەزوكشەلىكپەن اينالىسقان 23 قىز بەن ونى ۇيىمداستىرۋمەن اينالىسقان 12 جەڭگەتاي قولعا ءتۇستى. ەندى ولار زاڭ الدىندا جاۋاپ بەرەدى" دەلىنگەن اقپاراتتى پوليتسيا رەسمي تۇردە جوققا شىعاردى.

ال، ەندى نەگە مۇناي كومپانيالارى مەن بيلىك بۇل توبەلەستى قىزدان شىققان دەگەن اقپاراتتىڭ تارالۋىنا كوپتەپ ءمان بەردى؟ نەگە بۇل وقيعانى تۇرمىستىق دەڭگەيدەگى "قىزعا تالاس"  رەتىندە كورسەتۋگە تىرىستى؟

سەبەبى، مۇنايشىلاردىڭ قويعان تالاپتارى ولار ءۇشىن ءتيىمسىز ەدى. شەت ەلدەن كەلگەندەر مەن جەرگىلىكتى جۇمىسشىلاردىڭ ايلىقتارى بىردەي بولسىن. الەۋمەتتىك قۇقىقتارى دا بىردەي بولسىن دەپ تالاپ قويعان بولاتىن  مۇنايشىلار. ارتىنشا، قر پرەزيدەنتى قاسىم-جومارت توقاەۆ تا مۇناي كومپانيالارىنداعى شەت ەلدىك جۇمىسشىلار مەن جەرگىلىكتى جۇمىسشىلاردىڭ جالاقىلارى بىردەي بولۋىن تاپسىردى.

قازىر "تەڭىز" تىنىشتالدى. شامىرقانسا، شامدانسا "جاعالاۋعا" قانداي قاتەر توندىرەتىنىن الەم كوردى. بىزگە كەرەگى جاعاسىندا شاعالاسى شاڭقىلداعان بەيبىت، مامىراجاي "تەڭىز"...

"ادىرنا" ۇلتتىق پورتالى

 

 

پىكىرلەر