Teńizdegi tolqýǵa qyz kináli me?

3870
Adyrna.kz Telegram

Teńiz tolqyp baryp, basyldy. Halyqtyń ashýyn basý úshin bılik te artqa qadam jasady. Resmı aqparattarda taralyp júrgendeı tóbeleske Lıvııa azamaty Elı Daýd pen qazaq qyzynyń túsken fotosy sebep boldy-mys. Bılik te osy versııaǵa kóp basymdyq berdi. Artynan tikeleı efırde jynystyq qatynasqa túsken arab jigiti men qazaq qyzy delingen vıdeo áleýmettik jelide keń taraǵan bolatyn. Máseleniń anyǵy qalaı boldy?

Atyraýlyq munaıshylardyń aıtýynsha, másele áleýmettik ádiletsizdik pen turmystyq teńsizdikte. "Shet eldik jumysshylar men jergilikti ult ókilderiniń jalaqy mólsheriniń aıyrmashylyǵy, tamaq ishetin kezde shet elden kelgenderdiń qazaqtarmen birge otyrmaıtyny, búkil qara jumysty jergilikti ult ókili istese de mardymsyz jalaqy alatyny, kelimsekterdiń bóten jerde taltańdap júrgenimen qoımaı, jer ıesi qazaqtardy adam eken dep kózge ilmeýi kópten beri keýdege zapyran bolyp jınalǵan bolatyn" deıdi bizge aty-jónin aıtýdan bas tartqan munaıshy.

Ózin "Teńizshevroıl" kompanııasynda jumys isteımin dep tanystyrǵan aty-jónin aıtpaǵan jumysshylardyń biri 29 maýsymda "Azattyq" radıosyna "15 myń jumysshynyń narazylyqqa shyqqanyn" aıtqan bolatyn.

"Negizi jumysshylar baıaǵydan-aq jalaqyny talap etip, yzalanyp júrgen edi. Myna sýretten keıin qatty ashýlanyp, shydamaı ketti" deıdi ol.

Onyń ústine 29 maýsymda tańerteń «arab tekti qyzmetkerler qataryndaǵy SSER JShS ókilderiniń Elı Daýdtyń jumystan shyǵarylýyna baılanysty qazaqstandyq jumysshylardyń eńbek tártibin baqylaýdy kúsheıtý týraly pikirleri qazaqstandyq jumysshylardyń narazylyǵyn týdyrǵan.

Óz jerinde ógeı balanyń kúıin keshken jergilikti munaıshylar mundaı ádiletsizdikke qashanǵy tózsin? Eger, qyzǵa baılanysty jurt kóterilse onda Elıdy ǵana jazalaýshy edi. Bul jerde tóbeles arabtardyń jumystan bosatylǵan Elıdy qoldap, jergilikti qazaqtarǵa aıbat shekkeninen bastalǵan sekildi. Prokýratýranyń resmı málimdemesi delingen áleýmettik jelidegi qujatta solaı deıdi.

Bizdiń qoǵam aqparattyq shabýyldan qanshalyqty qorǵalǵan? Nege dızınformaııaǵa jıi senip qala beremiz? Naqty da, anyq aqparat bılik ókilderiniń nemese resmı tulǵalardyń aýzynan ýaqytynda aıtylmaǵandyqtan, jurt alyp-qashpa áńgimeni shyndyq retinde qabyldaıtyn bolady. Keshegi Arys oqıǵasynda da solaı bolǵan bolatyn.

Mysaly, tikeleı efırde jynystyq qatynasqa túsken qyz qazaq emes eken. Soqqyǵa jyǵyldy degen qyz reseılik kýrsant qyz Karına Oroeva bolyp shyqty.

 

Artynan jelide jeldeı esken "SSER kompanııasynan 237 arab, 780 qytaı, 578 úndi jumystan birjola shyǵarylyp, ornyna Qazaqstan azamattary alynatyn boldy. Vahtalyq qalashyqta jezókshelikpen aınalysqan 23 qyz ben ony uıymdastyrýmen aınalysqan 12 jeńgetaı qolǵa tústi. Endi olar zań aldynda jaýap beredi" delingen aqparatty polıııa resmı túrde joqqa shyǵardy.

Al, endi nege munaı kompanııalary men bılik bul tóbelesti qyzdan shyqqan degen aqparattyń taralýyna kóptep mán berdi? Nege bul oqıǵany turmystyq deńgeıdegi "qyzǵa talas"  retinde kórsetýge tyrysty?

Sebebi, munaıshylardyń qoıǵan talaptary olar úshin tıimsiz edi. Shet elden kelgender men jergilikti jumysshylardyń aılyqtary birdeı bolsyn. Áleýmettik quqyqtary da birdeı bolsyn dep talap qoıǵan bolatyn  munaıshylar. Artynsha, QR prezıdenti Qasym-Jomart Toqaev ta munaı kompanııalaryndaǵy shet eldik jumysshylar men jergilikti jumysshylardyń jalaqylary birdeı bolýyn tapsyrdy.

Qazir "Teńiz" tynyshtaldy. Shamyrqansa, shamdansa "jaǵalaýǵa" qandaı qater tóndiretinin álem kórdi. Bizge keregi jaǵasynda shaǵalasy shańqyldaǵan beıbit, mamyrajaı "Teńiz"...

"Adyrna" ulttyq portaly

 

 

Pikirler