"جاعداي بۇدان دا اۋىر بولار ەدى": بەككەر ارىستاعى تاڭعالارلىق جايت تۋرالى ايتتى

 ىىم توتەنشە جاعدايلار كوميتەتىنىڭ توراعاسى ۆلاديمير بەككەر ارىستاعى جارىلىس بۇدان دا جويقىن بولۋى مۇمكىن ەكەنىن ايتتى، دەپ حابارلايدى "ادىرنا" ۇلتتتىق پورتالى Sputnik قازاقستان سايتىنا سىلتەمە جاساپ.

"تەمىر جولدا  ءتۇرلى زاتتار ساقتالعان 460 تسەستەرنا بولعان. ولاردىڭ جارىلماۋى ادام تاڭعالارلىق جاعداي. جاعداي بۇدان دا اۋىر بولار ەدى. بۇگىندە ارىس پەن قالا ماڭىنان ساپەرلەر 12 مىڭنان استام جارىلعىش زات تاپتى. جارىلىستان 3 ادام قازا تاپتى. 2 اسكەري جارىلىس وشاعىندا جۇرگەن، ال ءبىر تۇرعىن جارىلعىش زاتتىڭ جارقىنشاعى ءتيىپ، كوز جۇمعان", - دەدى ۆلاديمير بەككەر.

ونىڭ ايتۋىنشا، قازىرگى تاڭدا 50 ادام اۋرۋحانادا جاتىر.

"ولاردىڭ اراسىندا اۋىر جاراقات العاندار مەن بالالار بار. ءبارى امان قالسىن دەپ تىلەيىك", - دەدى توتەنشە جاعدايلار كوميتەتىنىڭ توراعاسى.

سونداي-اق، بەككەر 24 ماۋسىم كۇنى ەلوردادان ارىسقا قالاي جەتكەنىن دە ايتىپ ءوتتى.

"مەن ساعات 13:00-دە قورعانىس مينيسترىمەن بىرگە ۇشتىم. كەيىن وقيعا ورنىنا تىكۇشاقپەن جەتتىك. ءبىزدى سول جەردەگى اسكەريلەر كۇتىپ الدى. ولار بروندى كيىم مەن كاسكادا بولدى. ءبىز دە وق وتپەيتىن كيىم كيدىك. جارىلىس وشاعىنا بروندى ماشينامەن جەتتىك", - دەيدى ۆلاديمير بەككەر ورتالىق كوممۋنيكاتسيالار قىزمەتىندە وتكەن بريفينگتەن سوڭ جۋرناليستەرگە.

ونىڭ ايتۋىنشا، ارىس قالاسىنا بارعان كەزدە جويقىن جارىلىستارعا كۋا بولعان.

"ول جەردە جارىلىستار ءالى بولىپ جاتتى. ءبىز قالا مەن ونىڭ سىرتىن ارالاپ شىقتىق. كەيىن جارىلىس بولعان اسكەري بولىمگە باردىق. اسكەريلەر وقيعا ورنىنان قاشىپ كەتكەن جوق. وندا قارۋ-جاراق تا بولدى عوي. ولار بولىمدەگى زاتتاردىڭ قاۋىپسىزدىگىن قامتاماسىز ەتۋ ءۇشىن ءتيىستى شارا قولداندى", - دەدى توتەنشە جاعدايلار كوميتەتىنىڭ توراعاسى.

ۆلاديمير بەككەر اسكەري قويمادا قانداي وق-دارىلەردىڭ جارىلعانىن ايتىپ بەردى.

"اسكەري ءبولىمنىڭ كارتاسىن كوردىڭىزدەر مە؟ ونى Google ارقىلى كورە الاسىزدار. اسكەري بولىمدە 3 قويمانى كوردىك. وندا ارتيللەريا، ينجەنەرلىك مينالار ساقتالعان. قاتەلەسپەسەم، قويمالاردىڭ ءبىرى جارىلعان. 3 شاقىرىم جەردە ينجەنەرلىك مينا ساقتالعان قويما ورنالاسىپتى. ونداعى مينالار دا دەتوناتسيالانعان", - دەيدى ول.

ارىستاعى توتەنشە جاعداي

24 ماۋسىمدا تۇركىستان وبلىسىنداعى ارىس قالاسىندا جارىلىس بولدى. قالا جانىنداعى اسكەري ءبولىمنىڭ قويماسىندا ءورت شىعىپ، وق-ءدارى جارىلا باستاعان.

جەرگىلىكتى تۇرعىنداردىڭ ۇرەيى ۇشىپ، ۇيلەرىن تاستاپ قاشا باستادى. حالىقتى شىمكەنت جانە باسقا كورشىلەس ەلدى مەكەندەرگە ەۆاكۋاتسيالاۋ باستالدى.

جارىلىس سالدارىنان ءۇش ادام قازا تاپتى: ءبىر تۇرعىن جانە ەكى اسكەري قىزمەتكەر.

توتەنشە جاعداي سالدارىنان كەلگەن شىعىن مولشەرى 20 ميلليارد تەڭگەشاماسىندا دەپ بولجانىپ وتىر.