قاڭتار وقيعاسىنا بايلانىستى 20 جىلعا سوتتالعان قىلمىس الەمىنىڭ سەركەسى ارمان جۇماگەلديەۆ («ديكي ارمان») وزىنە قول جۇمساماق بولدى، دەپ حابارلايدى "ادىرنا" ۇلتتىق پورتالى.
بۇل تۋرالى قر ىشكى ىستەر مينيسترلىگىنىڭ ءباسپاسوز قىزمەتى حابارلادى.
قىلمىستىق-اتقارۋ جۇيەسى كوميتەتىنىڭ مالىمەتىنشە، سوتتالعان ازامات وزىنە ازداعان جاراقات كەلتىرگەن. وعان شۇعىل مەديتسينالىق كومەك كورسەتىلىپ، قازىرگى تاڭدا دەنساۋلىق جاعدايى قاناعاتتانارلىق دەپ باعالانۋدا. سونىمەن قاتار، جۇماگەلديەۆ ەرەكشە باقىلاۋعا الىنعان، ونىمەن مەكەمە پسيحولوگتارى جۇمىس جۇرگىزۋدە.
وسى وقيعاعا بايلانىستى قىزمەتتىك تەكسەرۋ تاعايىندالعان.
ەسكە سالا كەتسەك، 2022 جىلى قاڭتار وقيعاسى كەزىندە الماتىدا ارمان جۇماگەلديەۆ ۇستالىپ، وعان بىرنەشە اۋىر قىلمىس بويىنشا ايىپ تاعىلعان بولاتىن. قر باس پروكۋراتۋراسىنىڭ مالىمەتىنشە، «ديكي ارمان» توبى 24 بەيبىت تۇرعىندى ۇرلاپ، زاڭسىز باس بوستاندىعىنان ايىرعان.
2023 جىلدىڭ قىركۇيەك ايىندا الماتى ماڭىنداعى № 72 تۇزەۋ مەكەمەسىنىڭ تەرگەۋ يزولياتورىندا وعان جانە ءماسليحاتتىڭ ەكس-دەپۋتاتى قايرات قۇدايبەرگەنگە قاتىستى سوت پروتسەسى باستالدى. ارمان جۇماگەلديەۆ جەتەكشىلىك ەتكەن ۇيىمداسقان قىلمىستىق توپتىڭ 15 مۇشەسى ۇستالدى.
2025 جىلدىڭ 27 قاڭتارىندا سوت ۇكىمى شىعىپ، «ديكي ارمان» 20 جىلعا باس بوستاندىعىنان ايىرىلدى.
