اتىراۋدا ءوتىپ جاتقان ۇلتتىق قۇرىلتايدا پرەزيدەنت قاسىم-جومارت توقاەۆ ەلتاڭبا وزگەرەتىنىن جاريالادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
مەملەكەت باسشىسى مەملەكەتتىك رامىزدەردە ۇلتتىق بىرەگەيلىگىمىزدىڭ ايقىن كورىنىس تاپقانىن مالىمدەدى.
«مەن بىلتىر ايماقتاردىڭ نىشانىن، ياعني سيمۆوليكاسىن جۇيەلەپ، بىرىڭعاي ستاندارتقا كەلتىرۋ قاجەتتىگىن ايتتىم. نىشانداردان سول ءوڭىردىڭ ەرەكشەلىگىمەن قاتار، ەلىمىزدىڭ بولمىس-ءبىتىمى دە بايقالۋعا ءتيىس. قازىر وسى باعىتتا ناقتى جۇمىس جاسالىپ جاتىر. بۇعان ماماندار، ساراپشىلار جانە بەلسەندى ازاماتتار اتسالىسۋدا. سونىمەن قاتار ولار مەملەكەتتىك نىشاندارىمىزدى تۇگەل جاڭعىرتۋ تۋرالى پىكىر ايتىپ جاتقانىن بىلەمىن.
ءبىزدىڭ كوك تۋىمىزدا ءمىن جوق. وندا ەلىمىزدىڭ بىرەگەي بولمىسى ناقتى بەينەلەنگەن. ءانۇرانىمىز دا ناعىز ۇلتتىق رۋحتى پاش ەتەدى. قازاقتىڭ ءانۇرانى الەمنىڭ ءار تۇكپىرىندە شىرقالىپ ءجۇر. جاڭا جىلدى جاقىندارىمىزدىڭ ورتاسىندا انۇرانمەن قارسى الۋ جاقسى داستۇرگە اينالدى. ءبىر سوزبەن ايتساق، ءانۇرانىمىزدىڭ ءسوزى دە، اۋەنى دە حالىقتىڭ جۇرەگىنە ابدەن ورنىققان»،—دەدى ول.
پرەزيدەنتتىڭ ايتۋىنشا، كوپشىلىك قازىرگى ەلتاڭبانى كەڭەس زامانىنداعى گەربكە ۇقساتىپ ءجۇر.
«ال ەلتاڭبامىزعا قاتىستى سىني پىكىرلەر ايتىلىپ قالادى. ونى كەڭەس زامانىنداعى گەربكە ۇقساتىپ جاتادى. تىم ەكلەكتيكالىق، كۇردەلى دەيدى. مۇنداي ويدى ەل ىسىنە بەي-جاي قارامايتىن بەلسەندى ازاماتتار عانا ەمەس، ماماندار دا ايتىپ ءجۇر. ورىندى پايىمدار ەسكەرۋسىز قالماۋى كەرەك.
ورتاق كەلىسىمگە كەلگەن جاعدايدا ارناۋلى كوميسسيا قۇرۋعا بولادى. بۇل كوميسسيا ماسەلەنى جان-جاقتى قاراستىرىپ، قوعامدىق تالقىلاۋ وتكىزەدى. سوسىن قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالانادى»،—دەپ تولىقتىردى توقاەۆ.
قازاقستاننىڭ قازىرگى رامىزدەرى 1992 جىلى جازدا قابىلدانعان بولاتىن.
