Atyrauda ötıp jatqan Ūlttyq qūryltaida prezident Qasym-Jomart Toqaev eltaŋba özgeretının jariialady, dep habarlaidy «Adyrna» tılşısı Aqordaǧa sılteme jasap.
Memleket basşysy memlekettık rämızderde ūlttyq bıregeilıgımızdıŋ aiqyn körınıs tapqanyn mälımdedı.
«Men byltyr aimaqtardyŋ nyşanyn, iaǧni simvolikasyn jüielep, bıryŋǧai standartqa keltıru qajettıgın aittym. Nyşandardan sol öŋırdıŋ erekşelıgımen qatar, elımızdıŋ bolmys-bıtımı de baiqaluǧa tiıs. Qazır osy baǧytta naqty jūmys jasalyp jatyr. Būǧan mamandar, sarapşylar jäne belsendı azamattar atsalysuda. Sonymen qatar olar Memlekettık nyşandarymyzdy tügel jaŋǧyrtu turaly pıkır aityp jatqanyn bılemın.
Bızdıŋ Kök tuymyzda mın joq. Onda elımızdıŋ bıregei bolmysy naqty beinelengen. Änūranymyz da naǧyz ūlttyq ruhty paş etedı. Qazaqtyŋ änūrany älemnıŋ är tükpırınde şyrqalyp jür. Jaŋa jyldy jaqyndarymyzdyŋ ortasynda änūranmen qarsy alu jaqsy dästürge ainaldy. Bır sözben aitsaq, änūranymyzdyŋ sözı de, äuenı de halyqtyŋ jüregıne äbden ornyqqan»,—dedı ol.
Prezidenttıŋ aituynşa, köpşılık qazırgı eltaŋbany Keŋes zamanyndaǧy gerbke ūqsatyp jür.
«Al eltaŋbamyzǧa qatysty syni pıkırler aitylyp qalady. Ony Keŋes zamanyndaǧy gerbke ūqsatyp jatady. Tym eklektikalyq, kürdelı deidı. Mūndai oidy el ısıne bei-jai qaramaityn belsendı azamattar ǧana emes, mamandar da aityp jür. Oryndy paiymdar eskerusız qalmauy kerek.
Ortaq kelısımge kelgen jaǧdaida arnauly komissiia qūruǧa bolady. Būl komissiia mäselenı jan-jaqty qarastyryp, qoǧamdyq talqylau ötkızedı. Sosyn Qazaqstannyŋ jaŋa eltaŋbasynyŋ jobasyn jasauǧa aşyq baiqau jariialanady»,—dep tolyqtyrdy Toqaev.
Qazaqstannyŋ qazırgı rämızderı 1992 jyly jazda qabyldanǧan bolatyn.
