بۇگىن ساۋد ارابياسىنىڭ استاناسىندا One Water ءسامميتىنىڭ اشىلۋ سالتاناتى ءوتتى. سامميتتە تۇركىمەنستاننىڭ ەكس-پرەزيدەنتى، قازىرگى حالىق ءماسلاحاتىنىڭ باسشىسى عۇربانعۇلى بەردىمۇحامەدوۆ بوي كورسەتتى، دەپ حابارلايدى “ادىرنا” ۇلتتىق پورتالى.
قازاقستان پرەزيدەنتى قاسىم-جومارت توقاەۆ One Water ءسامميتىنىڭ اشىلۋ سالتاناتىندا ءسوز سويلەدى.
ول سۋ قاۋىپسىزدىگى ورنىقتى دامۋدىڭ، ەكونوميكالىق ورلەۋدىڭ جانە قورشاعان ورتانى قورعاۋدىڭ نەگىزى بولىپ سانالاتىنىن اتاپ ءوتتى.
سامميتتە ساۋد ارابياسىنىڭ تاق مۇراگەرى، پرەمەر-ءمينيسترى مۇحاممەد بەن سالمان ءال ساۋد، فرانتسيا پرەزيدەنتى ەممانيۋەل ماكرون، دۇنيەجۇزىلىك بانك توبىنىڭ پرەزيدەنتى ادجاي بانگا، سۋ رەسۋرستارى ەكونوميكاسى جونىندەگى جاھاندىق كوميسسيانىڭ تەڭ توراعاسى (GCEW) يوحان روكسترەم جانە باسقا ەل باسشىلارىمەن بىرگە تۇركىمەنستاننان ەكس-پرەزيدەنت عۇربانعۇلى بەردىمۇحامەدوۆ بارعان.
ايتا كەتسەك، تۇركىمەنستاندى 16 جىلعا جۋىق باسقارعان عۇربانعۇلى بەردىمۇحامەدوۆ 2022 جىلدىڭ كوكتەمىندە قىزمەتىنەن كەتتى.
ناۋرىزدا پرەزيدەنت قىزمەتىنەن كەتكەن عۇربانعۇلى بەردىمۇحامەدوۆ ءوزىنىڭ باقىلاۋىنداعى سايلاۋ ارقىلى بيلىكتى ۇلى سەردارعا تابىستادى.
2006 جىلدان بەرى ەلدە قاتاڭ بيلىك جۇرگىزىپ كەلگەن بۇرىنعى پرەزيدەنت وتستاۆكاعا كەتسە دە، مەملەكەتتى باسقارۋ اپپاراتىنا ىقپالى ءالى ءجۇرىپ تۇر.
بەردىمۇحامەدوۆ پرەزيدەنت بولماسا دا، مەملەكەت باسشىلارىن قابىلداپ، ۇكىمەت وتىرىسىنا قاتىسىپ، وڭىرلەردى ارالاپ شىعىپ تۇرادى.
ونىڭ "ارقاداع" ("قورعاۋشى") دەگەن مارتەبەسى دە بار.
