پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا مادەنيەت جانە ونەر قىزمەتكەرلەرىن كاسىبي مەرەكەسىمەن قۇتتىقتاپ، سالانى دامىتۋ باعىتىندا اتقارىلىپ جاتقان جۇمىستار تۋرالى ايتتى، دەپ حابارلايدى «ادىرنا» ءتىلشىسى.
«سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن! مادەنيەت – مەملەكەتتىلىگىمىزدىڭ رۋحاني تىرەگى، حالقىمىزدىڭ تاريحي ساناسى مەن ۇلتتىق بولمىسىنىڭ ايقىن كورىنىسى. قوعامدى ورتاق قۇندىلىقتار توڭىرەگىنە ۇيىستىرىپ، ەلدىڭ رۋحاني تۇتاستىعىن بەكەمدەيتىن قۋاتتى كۇش. بۇگىندە جاڭا كونستيتۋتسيا اياسىندا مادەنيەتكە، بىلىمگە، عىلىم مەن يننوۆاتسياعا ايرىقشا ءمان بەرىلىپ وتىر. بۇل مادەنيەت سالاسىنىڭ الدىنا جاڭا مىندەتتەر قويىپ، دامۋدىڭ تىڭ مۇمكىندىكتەرىن اشتى. ەندىگى ماقسات – باي مۇرامىزدى ۇقىپتى ساقتاۋمەن قاتار، زاماناۋي فورماتتاردى، تسيفرلىق شەشىمدەردى، كرەاتيۆتى يندۋستريالاردى جانە كورەرمەنمەن، وقىرمانمەن، جالپى جۇرتشىلىقپەن جۇمىس ىستەۋدىڭ جاڭا تاسىلدەرىن باتىل دامىتۋ»،– دەدى ول.
ايدا بالاەۆا سوڭعى جىلدارى مادەنيەت سالاسى قىزمەتكەرلەرىنىڭ مارتەبەسىن ارتتىرۋ، ەڭبەك جاعدايىن جاقسارتۋ جانە وڭىرلەردەگى مادەنيەت نىساندارىن دامىتۋ باعىتىندا ماڭىزدى جۇمىستار اتقارىلعانىن مالىمدەدى. پرەزيدەنت تاپسىرماسىمەن بىرقاتار جەتەكشى مادەنيەت مەكەمەسىنە «ۇلتتىق» مارتەبە بەرىلىپ، قىزمەتكەرلەردىڭ جالاقىسىن كوتەرۋگە مۇمكىندىك جاسالعان.
سونداي-اق وتكەن جىلى 61 مادەنيەت نىسانىنىڭ قۇرىلىسى باستالىپ، 252 نىسان جوندەۋدەن وتكەنى ايتىلدى. بيىل تاعى 64 نىساننىڭ قۇرىلىسى جالعاسىپ جاتىر. ال E-Museum تسيفرلىق پلاتفورماسى بۇگىندە 284 مۋزەيدى بىرىكتىرىپ، 65 مىڭنان استام جادىگەردى قامتىپ وتىر.
مينيستر مادەنيەت سالاسىنىڭ بۇگىندە اشىق ءارى جاڭاشىل باعىتتا دامىپ كەلە جاتقانىن اتاپ ءوتىپ، تەاتر، مۋزەي، كىتاپحانا، ارحيۆ جانە ونەر سالاسى ماماندارىنا العىس ءبىلدىردى.
«ارتيستەرگە، مۋزىكانتتارعا، كىتاپحاناشىلارعا، مۋزەي جانە ارحيۆ قىزمەتكەرلەرىنە، رەجيسسەرلەرگە، سۋرەتشىلەرگە، حورەوگرافتارعا، ساحنا مايتالاندارىنا، پەداگوگتەرگە، تەحنيكالىق ماماندارعا جانە ەلىمىزدىڭ رۋحاني بايلىعىن ساقتاپ، دامىتىپ جۇرگەن بارلىق سالا وكىلدەرىنە شىنايى ريزاشىلىعىمدى بىلدىرەمىن. سىزدەردىڭ ەڭبەكتەرىڭىز ۇلتتىڭ رۋحانياتىن بايىتىپ، جاس ۇرپاقتىڭ دۇنيەتانىمىن قالىپتاستىرادى، ەل بىرلىگىن نىعايتادى جانە قازاقستاننىڭ الەمدىك مادەني كەڭىستىكتەگى بەدەلىن ارتتىرا تۇسەدى.
الداعى ۋاقىتتا دا يگىلىكتى جولداعى قىزمەتتەرىڭىز تابىستى بولىپ، جۇرتشىلىقتىڭ ىستىق ىقىلاسى مەن قوشەمەتىنە بولەنە بەرىڭىزدەر. بارشاڭىزعا زور دەنساۋلىق، شىعارماشىلىق شابىت، تولايىم تابىس، وتباسىلارىڭىزعا اماندىق تىلەيمىن!»—دەدى مينيستر.
