ادىلەت ءمينيسترى ءبىرىنشى پرەزيدەنتتىڭ ەرەكشە مارتەبەسىنە قاتىستى تارماقتار كونستيتۋتسيادان الىنىپ تاستالعانىن ايتتى.
«سوعان سايكەس، وتاندىق زاڭنامانى كونستيتۋتسياعا سايكەستەندىرۋ جۇمىستارى جۇرگىزىلۋدە»، - دەدى قانات مۋسين.
دەگەنمەن، مينيستر زاڭ كۇشىنىڭ قاشان جويىلاتىنىن اشىپ ايتپادى.
"زاڭ، ارينە، كونستيتۋتسياعا سايكەستەندىرىلەدى. "تۇڭعىش پرەزيدەنت تۋرالى" زاڭ ءوز كۇشىن جوعالتتى دەپ تانۋ تۋرالى شەشىم قابىلدانادى. جۇمىس جۇيەلى جۇرگىزىلۋدە، ازىرگە مەرزىمى ناقتى بەلگىسىز، پروتسەسس پرەزيدەنت پەن پارلامەنت دەپۋتاتتارىنا تىكەلەي بايلانىستى", - دەپ جاۋاپ بەردى قانات مۋسين.
مينيستر دەپۋتاتتاردىڭ زاڭ جوباسىن ماقۇلداۋدا اسىقپاي وتىرعانىن ايتتى.
- ازىرگە مۇنداي زاڭ جوباسى پارلامەنتتەن ادىلەت مينيسترلىگىنە كەلىپ تۇسكەن جوق، كەلىپ تۇسكەن سوڭ عانا پىسىقتالاتىن بولادى.
بۇعان دەيىن ءماجىلىس دەپۋتاتى ەرلان سايروۆ پارلامەنتتە زاڭنامالىق اكتىلەردى كونستيتۋتسياعا سايكەستەندىرۋ ۇدەرىسى ءجۇرىپ جاتقانىن ايتتى. ونىڭ ايتۋىنشا، «ەلباسى تۋرالى» زاڭ كۇشى جىل سوڭىنا دەيىن توقتاتىلادى.
"ادىرنا" ۇلتتىق پورتالى