Memleket basşysy Qasym-Jomart Toqaev qazaqstandyq arulardy Halyqaralyq äielder künımen qūttyqtady, dep habarlaidy «Adyrna» tılşısı Aqordaǧa sılteme jasap.
«Sūlulyq pen üilesımdı aişyqtaityn şuaqty köktem merekesınde bız barşa asyl jandarǧa erekşe qūrmet körsetıp, yqylas-ıltipat bıldıremız.
Sızder türlı salada jemıstı eŋbek etıp, elımızdı örkendetuge belsendı atsalysyp kelesızder. Kez kelgen şaruaǧa jauapkerşılıkpen qarap, ärbır ıstıŋ berekesın arttyruǧa ūiytqy bolyp jürsızder»,—dedı ol.
Prezident ūrpaq tärbiesımen bırge qoǧamǧa paidaly jūmystardy da qatar atqaryp jürgen näzıkjandylardyŋ az emes ekenın atap öttı.
«Ardaqty analar bükıl sanaly ǧūmyryn balasynyŋ bolaşaǧyna arnap, öskeleŋ ūrpaqqa tälım-tärbie berıp otyr. Osy märtebelı missiiasyn käsıbi qyzmetımen jäne qoǧamǧa paidaly jūmystarmen bırge atqaryp jürgen arular da az emes.
Äielderge jan-jaqty jaǧdai jasau, olardyŋ qūqyǧyn qorǧau jäne otbasy institutyn nyǧaitu – memlekettık saiasattyŋ negızgı basymdyǧy.
Elımızdıŋ qyz-kelınşekterı jasampazdyq qasietımen qoǧamnyŋ qūndylyqtar jüiesın jaŋartuǧa jäne Ädılettı Qazaqstandy qūruǧa ölşeusız üles qosa beredı dep senemın.
Köktem merekesı köŋılderıŋızge şattyq syilasyn!
Barşaŋyzǧa baq-bereke jäne tolaǧai tabys tıleimın!»—dedı Qasym-Jomart Kemelūly.
Sondai-aq memleket basşysy Halyqaralyq äielder künıne arnalǧan merekelık şaraǧa qatysyp, «Aru-Ana» üzdık äielder jobasy baiqauynyŋ jeŋımpazdaryn marapattady. Būl joly marapat türlı salada äleumettık maŋyzy bar jobalardy jüzege asyryp, azamattyq qoǧamnyŋ damuyna eleulı üles qosyp jürgen qyz-kelınşekterge alty nominasiia boiynşa tabys etıldı.
«Aru-Ana» baiqauynyŋ jeŋımpazdary:
«Auyl äielderın damytuǧa arnalǧan üzdık joba» nominasiiasy boiynşa – Elşıbaeva Baqytgül Qazezbaiqyzy;
«Ǧylym salasyndaǧy üzdık joba» nominasiiasy boiynşa – Şakulikova Gülzada Täŋırbergenqyzy;
«Azamattyq sana-sezımdı damytu baǧytyndaǧy üzdık joba» nominasiiasy boiynşa – Ahmedjanova Äliia Serıkbolqyzy;
«Ūlttyq mädeni mūrany nasihattau baǧytyndaǧy üzdık joba» nominasiiasy boiynşa – Mihaliova Anastasiia Anatolevna;
«Agrobiznes salasyndaǧy üzdık joba» nominasiiasy boiynşa – Arqaşbaeva Botagöz Mahambetqaliqyzy;
«Kreativtı industriia salasyndaǧy üzdık joba» nominasiiasy boiynşa – Edılbekova Mädina Edılbekqyzy.
