الماتىدا شىمبۇلاقتا SCIJ (The Ski Club of International Journalists) حالىقارالىق شاڭعىشى جۋرناليستەر كلۋبىنىڭ 69-شى وتىرىسى اشىلدى، دەپ حابارلايدى Azattyq Ruhy.
بيىل قازاقستان ۇيىمداستىرۋشى ەل رەتىندە الەمنىڭ 30-عا جۋىق ەلىنەن 150 ءجۋرناليستى قابىلداۋدا. جيىندى قازاقستان رەسپۋبليكاسى تۋريزم جانە سپورت ۆيتسە-ءمينيسترى سەرىك جاراسپاەۆ اشتى.
«بۇگىن سىزدەردى ەرەكشە ءىس-شارا - حالىقارالىق شاڭعىشى جۋرناليستەر كلۋبىندا قارسى الۋعا قۋانىشتىمىز. بۇل شارا تۇرلى ەلدەردىڭ كاسىپقويلارىن بىرىكتىرۋ ءۇشىن عانا ەمەس، سونىمەن قاتار ەلىمىزدىڭ كەرەمەت جەرلەرىمەن تانىسۋعا بىرەگەي مۇمكىندىك بەرۋ ءۇشىن جاسالعان»، - دەدى ۆيتسە-مينيستر.
ناۋرىزدىڭ 3 مەن 10 ارالىعىندا قاتىسۋشىلار ءۇشىن تاۋ شاڭعى بويىنشا جاتتىعۋلار مەن جارىستار، كاسىبي تاقىرىپتارداعى پىكىرتالاس، پايدالى كەزدەسۋلەر جانەقازاقستاننىڭ مادەنيەتى مەن ۇلتتىق تاعامدارىمەن تانىسۋ وتەدى.
SCIJ كەزەكتى كەزدەسۋىنىڭ باس سەرىكتەسى – «Kazakh Tourism» ۇلتتىق كومپانياسى. شارا الماتى قالاسى اكىمدىگىنىڭ قولداۋىمەن شىمبۇلاق تاۋ كۋرورتىنىڭ 70 جىلدىعى اياسىندا وتۋدە.
كلۋبتىڭ جىل سايىنعى وتىرىستارى حالىقارالىق جۋرناليستەر قاۋىمداستىعىنىڭ نىعايۋىنا سەپتىگىن تيگىزىپ قانا قويماي، ەل ءتۋريزمىنىڭ دامۋىنا دا اسەر ەتەدى. سوندىقتان الەمنىڭ تۇكپىر-تۇكپىرىنەن كەلگەن قوناقتاردى قارسى الۋ ارقىلى قازاقستان ءوزىن پەرسپەكتيۆتى تاۋ-شاڭعى باعىتى رەتىندە كورسەتۋگە مۇمكىندىك الدى. مۇنى «Kazakh Tourism» باسقارما توراعاسىنىڭ ورىنباسارى دانيەل سەرجانۇلى دا قوناقتاردى قۇتتىقتاۋ سوزىندە اتاپ ءوتتى.
«ۇلتتىق تۋريستىك كومپانيا رەتىندە ءبىز حالىقارالىق جۋرناليستەردىڭ نازارىنا ەلىمىزدىڭ كەرەمەتتەرىن پاش ەتۋ قۇرمەتىنە يە بولدىق. بۇل باسقوسۋ ەلىمىزدە جانە ودان تىس جەرلەردە قىسقى ءتۋريزمدى دامىتۋعا زور ۇلەس قوسادى دەگەن سەنىمدەمىز. وسى ءىس-شارا بارىسىنداعى يدەيالار، تاجىريبە مەن ءبىلىم الماسۋ قازاقستاننىڭ قىسقى سپورت تۇرلەرى مەن ءتۋريزمىنىڭ بولاشاعىن قالىپتاستىرۋعا تۇراقتى تۇردە اسەر ەتەتىنى ءسوزسىز»، - دەدى ول.
قازاقستاننىڭ SCIJ-دەگى تاريحى 2012 جىلدان باستاۋ الادى. سول جىلى ەلىمىز تۇركياداعى كلۋبتىڭ جىل سايىنعى وتىرىسىنا قوناق رەتىندە العاش رەت قاتىسقان بولاتىن. ال 2013 جىلدان باستاپ ءۇش ادامنان تۇراتىن قازاقستاندىق كوماندا يتاليادا وتكەن جيىندا SCIJ-كە رەسمي تۇردە قابىلداندى. SCIJ Kazakhstan كلۋبى قۇرىلعاننان بەرى 10 جىل ىشىندە قاتىسۋشىلار سانى 48 ادامعا دەيىن ءوستى.
كەزدەسۋدى وتكىزۋ بويىنشا SCIJ كلۋبىنىڭ باس سەرىكتەسى قازاقتۋريزم ۇلتتىق كومپانياسى بولىپ تابىلادى. كلۋبتىڭ سەرىكتەستەرى الماتى تۋريستىك بيۋروسى، Kaspi.kz, Everest Development, Porsche برەندىمەن Orbis-Auto, لوتتە-راحات، «ەۆرازيا»ساقتاندىرۋ كومپانياسى، Turkish Airlines جانە شىمبۇلاق تاۋ كۋرورتى بولدى.
قازاقستاندىق كلۋبتىڭ نەگىزگى ماقساتى – بەلسەندى ءومىر سالتىن ناسيحاتتاۋ، جۋرناليستەردى، جانە ولار ارقىلى حالىقتى قىسقى سپورت تۇرلەرىنە تارتۋ، حالىقارالىق ارەنادا قازاقستاننىڭ تۋريستىك الەۋەتىن ناسيحاتتاۋ، سونداي-اق قاتىسۋشى-جۋرناليستەردىڭ بۇقارالىق اقپارات قۇرالدارىندا ەلىمىزدىڭ جەتىستىكتەرى تۋرالى اقپارات بەرۋ.
