ەلىمىزدىڭ شەتىن جاۋ باسپاسىن دەپ قورعانىستى كۇشەيتۋ جازىلماعان زاڭدىلىق. قارۋلى كۇشتەردىڭ باستى مىندەتى دە بەيبىتشىلىك پەن تىنىشتىق اتتى قۇندىلىقتاردى قورعاۋ. ەگەمەن ەلدىڭ اق تاڭىنىڭ ارايلى، تۇرمىسىنىڭ جايلى بولۋىن تىكەلەي قاتاماسىز ەتەتىن اسكەري سالانىڭ ءار باسقان قادامى قاراشانىڭ قاشاندا قاپەرىندە. سايكەسىنشە، ۇلتقا قالتقىسىز قىزمەت ەتىپ جۇرگەن قارۋلى كۇشتەردىڭ بار جاعدايىن جاساۋ مەملەكەتكە ارتىلعان جۇك. بۇل تۋرالى، مەملەكەت باسشىسى قاسىم-جومارت توقاەۆتىڭ ءوزى قورعانىس سالاسىنىڭ الەۋەتىن نىعايتۋعا ءاردايىم باستى نازار اۋدارۋ كەرەك ، دەپ ءجيى ايتۋدا.
«گەوساياسي تۇراقسىزدىق، جاڭا سىن-تەگەۋرىندەر مەن قاۋىپ-قاتەرلەر جاعدايىندا ءبىز ۇلتتىق مۇددەمىزدى قورعاۋعا، مەملەكەتىمىزدىڭ ەگەمەندىگى مەن اۋماقتىق تۇتاستىعىن ساقتاۋعا دايىن بولۋىمىز كەرەك. سوندىقتان قورعانىس الەۋەتىن نىعايتۋ ءاردايىم ءبىزدىڭ ماڭىزدى باسىمدىعىمىز بولادى»، دەپ قاداپ ايتقان ەدى قاسىم-جومارت كەمەلۇلى.
راسىندا، زاماناۋي جابدىقتالعان اسكەر مەملەكەتتىگىمىزدىڭ بەرىك قورعانى. ەلىمىزدەگى قورعانىس-ونەركاسىپ كەشەنى كوشتەن قالماي وزىنە تيەسىلىنى ءوندىرۋ ۇستىندە. رەسپۋبليكادا ۇرىس قارۋلارىن شىعاراتىن مەملەكەتتىك جانە جەكە مەنشىك كاسىپورىن بار. ولاردىڭ جالپى سانى 50-گە جۋىق. قارۋ-جاراق، اسكەري تەحنيكا بويىنشا جىلىنا 200 ملرد تەڭگە ءونىم وندىرىلەدى ەكەن. جاۋاپتىلار بۇل مەجەمەن توقتاپ قالمايمىز دەپ سەندىرۋدە. تاياۋ كەلەشەكتە اسكەري تەحنيكانى جوندەۋ تەحنولوگياسىن ماماندار تولىقتاي يگەرسە، جوعارىدا اتالعان كورسەتكىشتەر بىرنەشە ەسەگە ۇلعايادى دەپ كۇتىلۋدە.
ەلىمىزدىڭ قورعانىس مينيسترلىگى قارۋ-جاراق وندىرەتىن وتاندىق ونەركاسىپ كەشەندەرىن جان-جاقتى قولداپ كەلەدى. ويتكەنى، قورعانىس-ونەركاسىپ كەشەنى - ۇلتتىق قاۋىپسىزدىكتى قامتاماسىز ەتۋدەگى باستى قۇرال. وتكەن جىلى قازاقستاندا ءدال وسى كەشەندى دامىتۋعا باعىتتالعان ارنايى قور قۇرىلعان بولاتىن. قوردىڭ نەگىزگى قىزمەتى – وتاندىق عىلىمي-تەحنيكالىق ازىرلەمەلەر مەن قورعانىس-ونەركاسىپ كەشەنىنىڭ جۇمىسىن جاڭعىرتۋ. پرەزيدەنت پارمەنىنە سايكەس، ەندىگىدە قور قورعانىس ونەركاسىبىندە ماماندانعان وتاندىق كومپانيالاردىڭ دامۋىنا تىكەلەي ىقپال ەتەتىن بولادى.
قازاقستان رەسپۋبليكاسىنىڭ پرەزيدەنتى «ادىلەتتى قازاقستاننىڭ ەكونوميكالىق باعىتى» اتتى جولداۋىندا يمپورتقا تاۋەلدىلىكتى ازايتۋعا مۇمكىندىك بەرەتىن، جەرگىلىكتى ءونىم ۇلەسى جوعارى ءوندىرىس كەشەنىن قۇرۋ – اسا ماڭىزدى مىندەت ، دەپ اسكەري تەحنيكا شىعارۋ سالاسىن جانداندىرۋدى قاجەت ەتەتىنىن مەڭزەدى.
«ءبىزدىڭ ارميامىز جوعارى تەحنولوگيالى قارۋ-جاراقپەن جانە اسكەري تەحنيكامەن، سونىڭ ىشىندە بروندى تەحنيكامەن، ۇشقىشسىز باسقارىلاتىن ۇشۋ اپپاراتتارىمەن، قازىرگى زامانعى اتىس قارۋلارىمەن جابدىقتالۋعا ءتيىس»،-دەدى قاسىم-جومارت توقاەۆ.
مەملەكەت باسشىسىنىڭ ايتۋىنشا، تەحنيكانى شۇعىل جوندەيتىن ءوندىرىس ورىندارىنىڭ قۋاتىن ارتتىرىپ، وتاندىق كاسىپورىندارعا بارىنشا قولداۋ كورسەتكەن ءجون. بىزدە وعان قاجەتتى ماتەريالدىق-تەحنيكالىق بازا، بىلىك پەن تاجىريبە جانە مامانداردا جەتەرلىك. تەك ولارعا قۇزىرلى مەكەمەلەردىڭ تاپسىرىسى كەرەك ەكەن.
پرەزيدەنت قازاقستان حالقىنا جولداۋىندا زاماناۋي تەحنولوگيا ترانسفەرتىن جاساۋ جانە جاڭا وندىرىستەر اشۋدى جولعا قويۋ كەرەكتىگىندە باسا ايتقان ەدى. ول سونداي-اق، قورعانىس-ونەركاسىپ كەشەنىن دامىتۋ قورى ارقىلى ءوز كاسىپورىندارىمىزعا تىكەلەي قارجىلىق قولداۋ كورسەتىلەدى دەپ قورعانىس سالاسىنىڭ سايىپ قىراندارىنا دەمەۋ بىلدىرگەن بولاتىن.
بۇگىندە مەملەكەت باسشىسى ايتقان تاپسىرمالار ءتيىستى دجەڭگەيدە ورىندالۋدا. ماسەلەن، توقاەۆ ءوز سوزىندە ايتقان ۇشقىشسىز باسقارىلاتىن ۇشاتىن تەحنيكادا العاشقى سىناعىنان ءوتتى. بۇلدا وتاندىق قورعانىس-ونەركاسىپ كەشەنىنىڭ جەتىستىگى.
قورعانىس مينيسترلىگىنىڭ ۇشقىشسىز باسقارىلاتىن قۇرىلعىلاردى دايىنداۋ تۋرالى سۇراۋىنا ەلدىڭ قورعانىس-ونەركاسىپ كەشەنىنىڭ قۇرامىنا كىرەتىن بىرنەشە قازاقستاندىق كومپانيا بىردەن جاۋاپ بەرگەن. قىسقا ۋاقىت ارالىعىندا وتاندىق وندىرۋشىلەر ۇشقىشسىز باسقارىلاتىن اپپاراتتى جاساپ شىعارعان. ءالى دە بولسا، ءبىر قايشاۋى ىشىندە بولعانىمەن باستاما جامان ەمەس، دەيدى ماماندار. جالپى، ەلىمىزدەگى بارلىق ۇشۋ تەحنيكاسى زاماناۋي بەينەباقىلاۋ قۇرالدارىمەن، داتچيكتەرمەن، قاشىقتىق ولشەگىشتەرمەن جانە تەپلوۆيزورلارمەن جابدىقتالعان. ۆەدومستۆو وكىلدەرىنىڭ سوزىنە سەنسەك، ۇشقىشسىز باسقارىلاتىن اپپاراتتاردى قارۋ-جاراق قۇرامىنا قابىلداۋ بيۋدجەت قاراجاتىن ەداۋىر ۇنەمدەۋگە، ولاردى كەيىننەن كۇتىپ ۇستاۋ جانە جاڭعىرتۋ ماسەلەلەرىن تەز ارادا شەشۋگە مۇمكىندىك بەرەدى.
بۇگىنگى كۇنى وزىمىزدە وندىرىلەتىن اسكەري تەحنيكانىڭ سان ءتۇرى بار. كەمەلەردەن باستاپ بروندى كولىكتەرگە دەيىن قازاقستاندىق قورعانىس-ونەركاسىپ كەشەنەرىندە شىعارىلادى. قورىتا ايتار بولساق، ەلىمىزدە تەحنولوگيانى دامىتۋعا قورعانىس-ونەركاسىپ كەشەندەرىنىڭ قوسقان ۇلەسى وراسان زور.
