Elimizdiń shetin jaý baspasyn dep qorǵanysty kúsheıtý jazylmaǵan zańdylyq. Qarýly kúshterdiń basty mindeti de beıbitshilik pen tynyshtyq atty qundylyqtardy qorǵaý. Egemen eldiń aq tańynyń araıly, turmysynyń jaıly bolýyn tikeleı qatamasyz etetin áskerı salanyń ár basqan qadamy qarashanyń qashanda qaperinde. Sáıkesinshe, ultqa qaltqysyz qyzmet etip júrgen qarýly kúshterdiń bar jaǵdaıyn jasaý memleketke artylǵan júk. Bul týraly, memleket basshysy Qasym-Jomart Toqaevtyń ózi qorǵanys salasynyń áleýetin nyǵaıtýǵa árdaıym basty nazar aýdarý kerek , dep jıi aıtýda.
«Geosaıası turaqsyzdyq, jańa syn-tegeýrinder men qaýip-qaterler jaǵdaıynda biz ulttyq múddemizdi qorǵaýǵa, memleketimizdiń egemendigi men aýmaqtyq tutastyǵyn saqtaýǵa daıyn bolýymyz kerek. Sondyqtan qorǵanys áleýetin nyǵaıtý árdaıym bizdiń mańyzdy basymdyǵymyz bolady», dep qadap aıtqan edi Qasym-Jomart Kemeluly.
Rasynda, zamanaýı jabdyqtalǵan ásker memlekettigimizdiń berik qorǵany. Elimizdegi qorǵanys-ónerkásip kesheni kóshten qalmaı ózine tıesilini óndirý ústinde. Respýblıkada urys qarýlaryn shyǵaratyn memlekettik jáne jeke menshik kásiporyn bar. Olardyń jalpy sany 50-ge jýyq. Qarý-jaraq, áskerı tehnıka boıynsha jylyna 200 mlrd teńge ónim óndiriledi eken. Jaýaptylar bul mejemen toqtap qalmaımyz dep sendirýde. Taıaý keleshekte áskerı tehnıkany jóndeý tehnologııasyn mamandar tolyqtaı ıgerse, joǵaryda atalǵan kórsetkishter birneshe esege ulǵaıady dep kútilýde.
Elimizdiń Qorǵanys mınıstrligi qarý-jaraq óndiretin otandyq ónerkásip keshenderin jan-jaqty qoldap keledi. Óıtkeni, qorǵanys-ónerkásip kesheni - ulttyq qaýipsizdikti qamtamasyz etýdegi basty qural. Ótken jyly Qazaqstanda dál osy keshendi damytýǵa baǵyttalǵan arnaıy Qor qurylǵan bolatyn. Qordyń negizgi qyzmeti – otandyq ǵylymı-tehnıkalyq ázirlemeler men qorǵanys-ónerkásip kesheniniń jumysyn jańǵyrtý. Prezıdent pármenine sáıkes, endigide Qor qorǵanys ónerkásibinde mamandanǵan otandyq kompanııalardyń damýyna tikeleı yqpal etetin bolady.
Qazaqstan Respýblıkasynyń prezıdenti «Ádiletti Qazaqstannyń ekonomıkalyq baǵyty» atty Joldaýynda ımportqa táýeldilikti azaıtýǵa múmkindik beretin, jergilikti ónim úlesi joǵary óndiris keshenin qurý – asa mańyzdy mindet , dep áskerı tehnıka shyǵarý salasyn jandandyrýdy qajet etetinin meńzedi.
«Bizdiń armııamyz joǵary tehnologııaly qarý-jaraqpen jáne áskerı tehnıkamen, sonyń ishinde brondy tehnıkamen, ushqyshsyz basqarylatyn ushý apparattarymen, qazirgi zamanǵy atys qarýlarymen jabdyqtalýǵa tıis»,-dedi Qasym-Jomart Toqaev.
Memleket basshysynyń aıtýynsha, tehnıkany shuǵyl jóndeıtin óndiris oryndarynyń qýatyn arttyryp, otandyq kásiporyndarǵa barynsha qoldaý kórsetken jón. Bizde oǵan qajetti materıaldyq-tehnıkalyq baza, bilik pen tájirıbe jáne mamandarda jeterlik. Tek olarǵa quzyrly mekemelerdiń tapsyrysy kerek eken.
Prezıdent Qazaqstan halqyna Joldaýynda zamanaýı tehnologııa transfertin jasaý jáne jańa óndirister ashýdy jolǵa qoıý kerektiginde basa aıtqan edi. Ol sondaı-aq, qorǵanys-ónerkásip keshenin damytý qory arqyly óz kásiporyndarymyzǵa tikeleı qarjylyq qoldaý kórsetiledi dep qorǵanys salasynyń saıyp qyrandaryna demeý bildirgen bolatyn.
Búginde memleket basshysy aıtqan tapsyrmalar tıisti djeńgeıde oryndalýda. Máselen, Toqaev óz sózinde aıtqan ushqyshsyz basqarylatyn ushatyn tehnıkada alǵashqy synaǵynan ótti. Bulda otandyq qorǵanys-ónerkásip kesheniniń jetistigi.
Qorǵanys mınıstrliginiń ushqyshsyz basqarylatyn qurylǵylardy daıyndaý týraly suraýyna eldiń qorǵanys-ónerkásip kesheniniń quramyna kiretin birneshe qazaqstandyq kompanııa birden jaýap bergen. Qysqa ýaqyt aralyǵynda otandyq óndirýshiler ushqyshsyz basqarylatyn apparatty jasap shyǵarǵan. Áli de bolsa, bir qaıshaýy ishinde bolǵanymen bastama jaman emes, deıdi mamandar. Jalpy, elimizdegi barlyq ushý tehnıkasy zamanaýı beınebaqylaý quraldarymen, datchıktermen, qashyqtyq ólshegishtermen jáne teplovızorlarmen jabdyqtalǵan. Vedomstvo ókilderiniń sózine sensek, ushqyshsyz basqarylatyn apparattardy qarý-jaraq quramyna qabyldaý bıýdjet qarajatyn edáýir únemdeýge, olardy keıinnen kútip ustaý jáne jańǵyrtý máselelerin tez arada sheshýge múmkindik beredi.
Búgingi kúni ózimizde óndiriletin áskerı tehnıkanyń san túri bar. Kemelerden bastap brondy kólikterge deıin qazaqstandyq qorǵanys-ónerkásip keshenerinde shyǵarylady. Qoryta aıtar bolsaq, elimizde tehnologııany damytýǵa qorǵanys-ónerkásip keshenderiniń qosqan úlesi orasan zor.
