قازاقستاندا گەولوگيالىق بارلاۋ سالاسىنا قارجى تىم از بولىنەدى. بۇل تۋرالى ونەركاسىپ جانە قۇرىلىس مينيسترلىگى گەولوگيا كوميتەتىنىڭ توراعاسى ەرلان اقباروۆ مالىمدەدى، دەپ حابارلايدى «ادىرنا» ءتىلشىسى kapital.kz-كە سىلتەمە جاساپ.
ونىڭ ايتۋىنشا، ەلىمىزدە پايدالى قازبا قورلارى سارقىلىپ، كەن ورىندارى تاۋسىلىپ جاتىر. سوندىقتان گەولوگيالىق بارلاۋ جۇمىستارىن جانداندىرۋ قاجەت.
«وكىنىشكە قاراي، گەولوگيالىق بارلاۋدى قارجىلاندىرۋى تومەن دەڭگەيدەگى ەلدەر قاتارىنا جاتامىز. قازاقستاندا قازىر ءبىر شارشى شاقىرىمدى قارجىلاندىرۋ 8 دوللاردى قۇرايدى. ماسەلەن، رەسەيدە بۇل كورسەتكىش 25 دوللار، وزبەكستاندا 98 دوللار بولىپ وتىر»، - دەدى ەرلان اقباروۆ.
توراعا گەولوگيالىق بارلاۋدى جەدەلدەتۋ كەرەك ەكەنىن ايتىپ، بۇل سالاعا ينۆەستيتسيانى ارتتىرۋ قاجەتتىگىن ءتۇسىندىردى.
«گەولوگيالىق بارلاۋدى جەدەلدەتۋ كەرەك. ءبىر وكىنىشتىسى، ەكونوميكامىزدىڭ نەگىزىن قالاۋعا، گەولوگيالىق سالاعا، جالپى مينەرالدىق-شيكىزات كەشەنىن دامىتۋعا تىم از كوڭىل بولىنۋدە. ينۆەستيتسيا كولەمىنىڭ ۇلعايۋى بايقالماعانىن باسا ايتۋىمىز ءتيىس»،—دەپ تولىقتىردى ول.
