27 قاراشا «استانا–الماتى» ۇشاعىندا دەنساۋلىق ساقتاۋ ءمينيسترى اقمارال ءالنازاروۆا العاشقى مەديتسينالىق كومەك كورسەتكەن جولاۋشى بەلگىلى جۋرناليست گۇلميرا ابىقاي بولىپ شىقتى. بۇل تۋرالى ول ءوزىنىڭ پاراقشاسىندا ءبولىستى، دەپ حابارلايدى “ادىرنا”.
گۇلميرا ابىقاي ۇشاق بورتىندا بولعان جاعدايدى بايانداپ، ءوزى ءمان-جايدى ءتۇسىندىرىپتى. سونداي-اق اياق استى قان قىسىمى كوتەرىلگەندە كومەككە تۇرا ۇمتىلعان ەلىمىزدىڭ باس دارىگەرىنە العىسىن بىلدىرگەن.
«كوبى “ستسەناري، وتىرىك” دەپ جاتىر. بۇل – راس، بولعان وقيعا. ءدال سول ورىندا وتىرعان جولاۋشى مەن ەدىم. دەر كەزىندە جانىمنان تابىلعان ەلىمىزدەگى ءبىرىنشى دارىگەر اقمارال النازاروۆاعا مىڭ العىس ايتقىم كەلەدى»، – دەدى جۋرناليست.
ايتا كەتەيىك، كەشە استانا – الماتى رەيسىندە جولاۋشىنىڭ جاعدايى ناشارلاپ، وعان دەنساۋلىق ساقتاۋ ءمينيسترى اقمارال ءالنازاروۆانىڭ كومەكتەسكەنى تۋرالى جازعان ەدىك.
