قازاقستان رەسپۋبليكاسى ۇكىمەتىنىڭ نازارىنا!
ارىس قالاسىن قالپىنا كەلتىرۋگە بايلانىستى سول قالانىڭ تۋماسى رەتىندە بىرنەشە ۇسىنىستارىمدى سىزدەرمەن بولىسكىم كەلىپ وتىر. وزدەرىڭىزگە بەلگىلى قالاداعى تۇرعىن ۇيلەر مەن عيماراتتاردىڭ 95 پايىزى قيراعانى تۋرالى اقپارات تاراپ جاتىر. 90-شى جىلدارداعى توقىراۋدان كەيىن ارىس قالاسىنىڭ توزىپ كەتكەنى ايتپاسا دا تۇسىنىكتى. قالا دەگەن قۇر اتاۋى بولماسا، قالاعا ساي كوركى دە، ينفراقۇرىلىمى دا جوق. قالا ورتالىعى سانالاتىن ورتالىق بازار اۋماعى ەسكى ءسۇرىنسىز عيماراتتار مەن ەشقانداي ارحيتەكتۋرالىق، قۇرىلىس ستاندارتتارىنا ساي كەلمەيتىن جابايى قۇرىلىستار قالانىڭ كوركىن قاشىرىپ تۇراتىن. قر پرەزيدەنتى توقاەۆ مىرزا ارىس قالاسىنداعى زارداپ شەككەن تۇرعىندارىمەن كەزدەسۋ بارىسىندا "قالانى قالپىنا كەلتىرەمىز" دەپ قاداپ ايتقانىنا كۋا بولدىق. ەندى قالا ورتالىعىندا ەسكىرگەن، مىنا جارىلىستاردان قيراعان، بۇلىنگەن عيماراتتاردى تولىقتاي بۇزىپ تاستاپ، ورنىنا شىن مانىندە قالاعا دەگەن اتقا لايىقتى، قالاعا كورىك بەرەتىن جانە ارىستىڭ جاڭارۋىنىڭ، جاڭعىرۋىنىڭ سيمۆولى بولاتىنداي زاماناۋي عيماراتتاردىڭ سالىنىپ، حالىق يگىلىگىنە بەرىلۋىن قالايمىز. ارىس قالاسىنىڭ ورتالىعىنداعى ەسكى الاڭ جانە سول ەسكى الاڭنىڭ ماڭىنداعى عيماراتتار، ت.تاجىباەۆ كوشەسىندەگى ەكىنشى دۇنيەجۇزىلىك سوعىس كەزىندە سالىنعان ەكى قاباتتى ەسكى ۇيلەردى سۇرۋگە جىبەرىپ، ورنىنا جاڭا ءزاۋلىم زاماناۋي تۇرعىن ۇيلەر سالىنسا، قالاعا كورىك بەرەتىن ەدى. قازىر وڭتۇستىك وڭىرىندە تۇركىستان قالاسىن دامىتۋ، كوركەيتۋ مەملەكەتتىك دەڭگەيدە قولعا الىنىپ، قارقىندى جۇزەگە اسىرىلىپ جاتقانى بەلگىلى، دەگەنمەن مەگوپوليس شىمكەنت پەن وبلىس ورتالىعى تۇركىستاننىڭ جانىندا، اراسىندا تۇرىپ، ارىس قالاسىنىڭ توزىعى جەتىپ، سيقى قاشىپ، قۇلدىراۋى، ەشقانداي ەستەتيكاعا ساي كەلمەيتىن جابايى قۇرىلىستار مەكەنىنە اينالۋى ادىلەتسىز دەپ ەسەپتەيمىز. سوندىقتان ۇكىمەتتەن مىنا توتەنشە جاعدايدان كەيىن "ارىس قالاسىن دامىتۋ جانە جاڭعىرتۋ جونىندە" باعدارلاما نە جوبا قابىلداپ، ونىڭ ۇكىمەتتە، پارلامەنتتە بەكىتىلىپ، اتقارۋشى بيلىك تاراپىنان ىسكە اسىرىلۋىن سۇرايمىز.
كەنجەعاراەۆ نويابر
"ادىرنا" ۇلتتىق پورتالى
