Kenjeǵaraev Noıabr: Arysty tolyqtaı buzyp tastap, ornyna jańa qala salý kerek!

1439

Qazaqstan Respýblıkasy Úkimetiniń nazaryna!

 Arys qalasyn qalpyna keltirýge baılanysty sol qalanyń týmasy retinde birneshe usynystarymdy sizdermen bóliskim kelip otyr. Ózderińizge belgili qaladaǵy turǵyn úıler men ǵımarattardyń 95 paıyzy qıraǵany týraly aqparat tarap jatyr. 90-shy jyldardaǵy toqyraýdan keıin Arys qalasynyń tozyp ketkeni aıtpasa da túsinikti. Qala degen qur ataýy bolmasa, qalaǵa saı kórki de, ınfraqurylymy da joq. Qala ortalyǵy sanalatyn Ortalyq bazar aýmaǵy eski súrinsiz ǵımarattar men eshqandaı arhıtektýralyq, qurylys standarttaryna saı kelmeıtin jabaıy qurylystar qalanyń kórkin qashyryp turatyn. QR Prezıdenti Toqaev myrza Arys qalasyndaǵy zardap shekken turǵyndarymen kezdesý barysynda "qalany qalpyna keltiremiz" dep qadap aıtqanyna kýá boldyq. Endi qala ortalyǵynda eskirgen, myna jarylystardan qıraǵan, búlingen ǵımarattardy tolyqtaı buzyp tastap, ornyna shyn máninde qalaǵa degen atqa laıyqty, qalaǵa kórik beretin jáne Arystyń jańarýynyń, jańǵyrýynyń sımvoly bolatyndaı zamanaýı ǵımarattardyń salynyp, halyq ıgiligine berilýin qalaımyz. Arys qalasynyń ortalyǵyndaǵy eski alań jáne sol eski alańnyń mańyndaǵy ǵımarattar, T.Tájibaev kóshesindegi Ekinshi dúnıejúzilik soǵys kezinde salynǵan eki qabatty eski úılerdi súrýge jiberip, ornyna jańa záýlim zamanaýı turǵyn úıler salynsa, qalaǵa kórik beretin edi. Qazir ońtústik óńirinde Túrkistan qalasyn damytý, kórkeıtý memlekettik deńgeıde qolǵa alynyp, qarqyndy júzege asyrylyp jatqany belgili, degenmen megopolıs Shymkent pen oblys ortalyǵy Túrkistannyń janynda, arasynda turyp, Arys qalasynyń tozyǵy jetip, sıqy qashyp, quldyraýy, eshqandaı estetıkaǵa saı kelmeıtin jabaıy qurylystar mekenine aınalýy ádiletsiz dep esepteımiz. Sondyqtan Úkimetten myna tótenshe jaǵdaıdan keıin "Arys qalasyn damytý jáne jańǵyrtý jóninde" Baǵdarlama ne joba qabyldap, onyń Úkimette, Parlamentte bekitilip, atqarýshy bılik tarapynan iske asyrylýyn suraımyz.

 

 

Kenjeǵaraev Noıabr

"Adyrna" ulttyq portaly


 

Pikirler
Redakııa tańdaýy