رەسەي ءسىم رەسمي وكىلى ماريا زاحاروۆا پرەزيدەنت قاسىم-جومارت توقاەۆتىڭ بۇۇ باس اسسامبلەياسى 80-سەسسياسىنىڭ جالپى دەباتىندا سويلەگەن سوزىنە پىكىر بىلدىرمەدى. بۇل تۋرالى رەسەيدىڭ سىرتقى ىستەر مينيسترلىگى مالىمدەدى، دەپ حابارلايدى «ادىرنا» ءتىلشىسى.
ايتۋلارىنشا، جەلىدە تاراعان ۆيدەو شىندىققا جاناسپايدى.
«قازاقستاندىق ونلاين-قوعامداستىقتاردا رەسەي ءسىم-ءنىڭ رەسمي وكىلىنىڭ سۇحبات كادرلارى قولدانىلىپ جاسالعان ديپفەيك تارالۋدا. ناقتى ۆيدەوجازباعا نەيروجەلى ارقىلى جاسالعان جاساندى ميميكا مەن زاحاروۆانىڭ داۋىسىن يميتاتسيالاعان اۋديو قوسىلعان»،—دەلىنگەن حابارلامادا.
مينيسترلىك بۇل ۆيدەونىڭ تەكتەن-تەك جاسالماعانىن اتاپ ءوتتى.
«بۇل — قاساقانا قازاقستاننىڭ تسيفرلىق كەڭىستىگىنە تاستالعان جالعان اقپارات. ونىڭ ماقساتى — رەسەي مەن قازاقستاننىڭ اراسىنا ىرىتكى سالۋ، حالىق اراسىندا وتكىر ەموتسيالىق رەاكتسيا تۋدىرۋ. بۇل فەيكتەگى بىردە-ءبىر ءسوز شىندىققا جاناسپايدى»، — دەپ تولىقتىردى رەسەي ءسىم.
رەسەي سىرتقى ىستەر مينيسترلىگى بۇل جاعدايدىڭ العاشقى ءارى جالعىز ارانداتۋشىلىق ەمەس ەكەنىن اتاپ ءوتتى.
«بۇل ارەكەتتەردەن ۋكراين ارنايى قىزمەتتەرىنىڭ، اسىرەسە اقپاراتتىق-پسيحولوگيالىق وپەراتسيالار ورتالىعىنىڭ قولتاڭباسى بايقالادى. الەۋمەتتىك جەلىلەردە جاريالانعان اقپاراتتى، سونىڭ ىشىندە بەينەماتەريالداردىڭ شىنايىلىعىن تەكسەرىپ وتىرۋدىڭ ماڭىزدىلىعىن ەسكەرتەمىز. رەسمي دەرەككوزدەرگە عانا سەنۋ قاجەت»، – دەدى مينيسترلىك وكىلدەرى.
