رەسەي پرەزيدەنتى ۆلاديمير پۋتين ماسكەۋدە اقش پرەزيدەنتىنىڭ ارنايى وكىلى ستيۆ ۋيتكوففپەن كەزدەستى. كەزدەسۋ ءۇش جارىم ساعاتتان استام ۋاقىتقا سوزىلدى، دەپ حابارلايدى "ادىرنا" پورتالى ربك-عا سىلتەمە جاساپ.
رەسەي تاراپىنان كەزدەسۋگە رف پرەزيدەنتىنىڭ ارنايى وكىلى كيريلل دميتريەۆ جانە كومەكشىسى يۋري ۋشاكوۆ قاتىستى.
امەريكالىق تاراپتى اقش پرەزيدەنتىنىڭ كۇيەۋ بالاسى دجارەد كۋشنەر جانە اقش جالپى قىزمەتتەر باسقارماسىنىڭ فەدەرالدىق ساتىپ الۋ قىزمەتىنىڭ كوميسسارى دجوش گريۋنباۋم ۇسىندى. گريۋنباۋم دونالد ترامپ قۇرعان «بەيبىتشىلىك كەڭەسىنىڭ» اتقارۋشى كوميتەتىنىڭ اعا كەڭەسشىسى بولىپ تاعايىندالىپ، ماسكەۋمەن كەلىسسوزدەرگە العاش رەت قاتىسىپ وتىر.
كەزدەسۋدىڭ رەسمي قورىتىندىسى جاريالانبادى. باق دەرەكتەرى بويىنشا، نەگىزگى تالقىلانعان تاقىرىپتار ۋكرايناداعى جاعدايدى رەتتەۋ جانە وعان قاتىستى ماسەلەلەر بولعان. بۇعان قوسا، پۋتين ماسكەۋدىڭ بەيبىتشىلىك كەڭەسىنە شاقىرۋى جانە مۇزداتىلعان رەسەيلىك اكتيۆتەر ماسەلەسى دە قارالاتىنىن ايتقان.
رەسەيلىك باق حابارلاۋىنشا، ۋشاكوۆتىڭ سوزىنشە، «كرەملدەگى كەزدەسۋ بارلىق جاعىنان پايدالى بولدى، ءارى رف، ءارى اقش ءۇشىن».
ۋشاكوۆ مالىمدەگەندەي، 23 قاڭتاردا ابۋ-دابيدە قاۋىپسىزدىك ماسەلەلەرى بويىنشا رەسەي – اقش – ۋكراينا ۇشجاقتى جۇمىس توبىنىڭ العاشقى وتىرىسى وتەدى. رف دەلەگاتسياسىن گرۋ باستىعى كوستيۋكوۆ باسقارادى.
تاسس دەرەگىنشە، كەزدەسۋدە رف تەرريتوريالىق ماسەلە شەشىلمەيىنشە ۋكرايناداعى ۇزاق مەرزىمدى شەشىمگە سەنۋگە بولمايتىنىن جەتكىزگەن; رەسەي شەشىمدى سوعىس الاڭىندا ىزدەۋدى جالعاستىرا بەرەتىنىن مالىمدەگەن. سونداي-اق بەيبىتشىلىك كەڭەسى، گرەنلانديا جانە باسقا دا بىرنەشە تاقىرىپتار تالقىلانعان.
كرەملدەگى كەلىسسوز دونالد ترامپ پەن ۋكراينا پرەزيدەنتى ۆلاديمير زەلەنسكيدىڭ داۆوستاعى كەزدەسۋلەرىنەن كەيىن ءوتتى. ليدەرلەر بايلانىستارىن وڭ باعالاعانىمەن، كيەۆ ءۇشىن كەپىلدىك بەرەتىن قۇجاتتارعا قول قويىلماعان.
سونداي-اق ۆلاديمير زەلەنسكي ءباا-دە 23–24 قاڭتاردا رەسەي، ۋكراينا جانە اقش اراسىنداعى ۇشجاقتى كەلىسسوزدەر وتەتىنىن الدىن الا حابارلاعان. Financial Times مالىمەتىنشە، تاراپتار «ەنەرگەتيكالىق قارۋلى توقتاتۋ» مۇمكىندىگىن تالقىلاۋدى جوسپارلاعان، ال امەريكالىق دەلەگاتسيا بۇل تاقىرىپتى كرەملدەگى كەزدەسۋدە كوتەرۋدى كوزدەگەن.
