ايدىڭ كۇننىڭ امانىندا ارىس اسپانى قاق ايىرىلارداي كۇي كەشتى. قالانىڭ شەتىندەگى اسكەري قارۋ-جاراق قويماسىنان شىققان ءورت الاپات جارىلىسقا ۇلاستى. مۇنىڭ سوڭى 45 مىڭ حالقى بار ءبىر قالانىڭ بوسىپ كەتۋىنە ۇلاستى.
ءبىز دە شۇعىل تۇردە وقيعا ورنىنا اتتاندىق. الماتىدان شىمكەنتكە تاڭ اتا جەتتىك. تۇسكە تامان عانا كەلگەن جۋرناليستەرمەن بىرگە ارىس قالاسىنا كىرۋگە رۇقسات الدىق. تاڭەرتەڭگى ساعات 11-دە وتكەن قورعانىس ءمينيسترىنىڭ ءباسپاسوز ءماسليحاتى وتكەنىن تىلشىلەر قاۋىمى بەسىن اۋا ءبىر-اق ەستىپ جاتتى.
حوش، بۇكىل ەلدى تىك تۇرعىزعان قالاعا دا كەلىپ كىردىك. كىردى دەگەن اتى عانا، ءتورت بىردەي بلوك پوستتان ءوتۋ وڭاي ەمەس. قالاعا كىرە بەرگەنىمىزدە جولدىڭ شەتىندەگى كىشكەنتاي بالالاردىڭ قاراۋسىز قالعان بەسىك اربالارى جۇرەكتى ءدىر ەتكىزدى. قايدا كەلگەنىمىزدى تەرەڭ سەزىنگەندەي بولدىق.
قالانىڭ ىشىندە اسكەر مەن پوليتسيا عانا. جەرگىلىكتى بىرەن-ساران تۇرعىنداردى كوردىك.
قالانى ۇلتتىق گۆارديانىڭ 580 ساربازى مەن 345 پوليتسيا قىزمەتكەرى كۇزەتىپ تۇر. "بىرەۋ تويعا اينالعاندا بىرەۋ قويعا اينالادى" دەگەندەي ۇرلىق جاساعان 3 ادام ۇستالىپتى.
ارىستاعى جارىلىستان كەيىن بارلىعى 165 ادام دارىگەرلەر كومەگىنە جۇگىنگەن. ولاردىڭ 89-ى اۋرۋحانادا جاتىر. توعىز ادامنىڭ جاعدايى اۋىر. دارىگەرلەر 76 ادامعا العاشقى كومەك كورسەتىپ، جىبەرگەن. بۇل تۋرالى 25 ماۋسىمدا نۇر-سۇلتاندا ۇكىمەت وتىرىسى كەزىندە دەنساۋلىق ساقتاۋ ءمينيسترى ەلجان ءبىرتانوۆ مالىمدەدى. قايتىس بولعاندار سانى ۇشەۋ.
قالانىڭ ءىشى تىپ-تىنىش. قورقىنىشتى وقيعانىڭ دالەلىندەي ورتەنگەن ۇيلەر مەن دۇكەندەردىڭ شاشىلعان اينەكتەرى.
وڭعار قابدەن
"ادىرنا" ۇلتتىق پورتالى
