Aıdyń kúnniń amanynda Arys aspany qaq aıyrylardaı kúı keshti. Qalanyń shetindegi áskerı qarý-jaraq qoımasynan shyqqan órt alapat jarylysqa ulasty. Munyń sońy 45 myń halqy bar bir qalanyń bosyp ketýine ulasty.
Biz de shuǵyl túrde oqıǵa ornyna attandyq. Almatydan Shymkentke tań ata jettik. Túske taman ǵana kelgen jýrnalıstermen birge Arys qalasyna kirýge ruqsat aldyq. Tańerteńgi saǵat 11-de ótken Qorǵanys Mınıstriniń baspasóz máslıhaty ótkenin tilshiler qaýymy besin aýa bir-aq estip jatty.
Hosh, búkil eldi tik turǵyzǵan qalaǵa da kelip kirdik. Kirdi degen aty ǵana, tórt birdeı blok posttan ótý ońaı emes. Qalaǵa kire bergenimizde joldyń shetindegi kishkentaı balalardyń qaraýsyz qalǵan besik arbalary júrekti dir etkizdi. Qaıda kelgenimizdi tereń sezingendeı boldyq.
Qalanyń ishinde ásker men polıııa ǵana. Jergilikti biren-saran turǵyndardy kórdik.
Qalany ulttyq gvardııanyń 580 sarbazy men 345 polıııa qyzmetkeri kúzetip tur. "Bireý toıǵa aınalǵanda bireý qoıǵa aınalady" degendeı urlyq jasaǵan 3 adam ustalypty.
Arystaǵy jarylystan keıin barlyǵy 165 adam dárigerler kómegine júgingen. Olardyń 89-y aýrýhanada jatyr. Toǵyz adamnyń jaǵdaıy aýyr. Dárigerler 76 adamǵa alǵashqy kómek kórsetip, jibergen. Bul týraly 25 maýsymda Nur-Sultanda úkimet otyrysy kezinde densaýlyq saqtaý mınıstri Eljan Birtanov málimdedi. Qaıtys bolǵandar sany úsheý.
Qalanyń ishi typ-tynysh. Qorqynyshty oqıǵanyń dálelindeı órtengen úıler men dúkenderdiń shashylǵan áınekteri.
Ońǵar Qabden
"Adyrna" ulttyq portaly
